वैदेशिक रोजगारीमा आकर्षक तलबको प्रलोभनमा पारी विभिन्न देशहरू पठाइदिन्छु भन्दै रकम ठगी गरेको अभियोगमा ४ जना पक्राउ परेका छन् ।
पक्राउ पर्नेहरूमा काठमाडौँ तारकेश्वर नगरपालिका–५ बस्ने ३३ वर्षीय दिपेन्द्र दाहाल, सोही नगरपालिका–१० बस्ने धादिङ घर भएका २७ वर्षीय रमेश दनै, टोखा नगरपालिका–९ बस्ने बागलुङ घर भएका २६ वर्षीय युवराज रिजाल र रोल्पा घर भएका ५० वर्षीय बिरसिंह बाठा रहेका छन् ।
प्रहरीका अनुसार दिपेन्द्रले स्पेन पठाइदिन्छु भन्दै ३ जना पीडितहरूबाट ३५ लाख ९४ हजार रुपैयाँ, रमेशले रोमानिया पठाइदिन्छु भन्दै १ जना पीडितबाट २ लाख रुपैयाँ, युवराजले न्यूजिल्याण्ड पठाइदिन्छु भन्दै १ जना पीडितबाट ४ लाख रुपैयाँ र बिरसिंहले बेलायत पठाइदिन्छु भन्दै १ जना पीडितबाट १६ लाख ७८ हजार रुपैयाँ लिई सम्पर्कविहीन भएका थिए ।
सम्पर्कविहीन भएपछि पीडितहरू दिएको उजुरीको आधारमा काठमाडौँ उपत्यका अपराध अनुसन्धान कार्यालय टेकुबाट खटिएको प्रहरीले दिपेन्द्रलाई काठमाडौँ महानगरपालिका–१० बाट शुक्रबार, रमेशलाई काठमाडौँ तार्केश्वर नगरपालिका–१० बाट शनिबार तथा युवराजलाई काठमाडौँ टोखा नगरपालिका–९ बाट र बिरसिहंलाई काठमाडौँ महानगरपालिका-१० बाट सोमबार पक्राउ गरेको हो ।
उनीहरूलाई आवश्यक अनुसन्धान तथा कारबाहीको लागि वैदेशिक रोजगार विभाग ताहाचल काठमाडौं पठाइएको छ ।
