मुक्तिनाथ होटेल एसोसिएसनको पहलमा मनाङ-मुस्ताङ जोड्ने अन्नपूर्ण संरक्षण क्षेत्रअन्तर्गतको पदमार्ग थोरङला पासको सोमबार २० जनाले हिउँ पन्छाएपछि मार्ग खुलेको छ ।
लमजुङको बेसी शहरदेखि मनाङ हुँदै विदेशी पर्यटकहरू थोरङला पास पदयात्रा गर्दै मुक्तिनाथ आइपुग्छन् । मुक्तिनाथ होटेल एसोसिएसनका अध्यक्ष सुरज गुरुङले मनाङ–मुस्ताङ जोड्ने थोरङला पास पदमार्ग बाक्लो हिउँ पन्छ्याएर पदयात्रा सहज पारिएको बताए ।
८-११ असोजसम्मको भारी हिमपातले थोरङला पास पदमार्ग पूर्ण रूपमा अवरुद्ध हुँदा पर्यटक आवागमन बन्द भएको थियो ।
अक्टोबरदेखि नोभेम्बरसम्म पर्यटकले साहसिक पदयात्रा गर्ने उपयुक्त स्थान थोरङला पासनै हो । मनाङ-मुस्ताङ अन्नपूर्ण चक्रीय पदमार्गमा बर्सेनि पाँच महिना मात्रै पर्यटकीय पदयात्रा हुने गर्छ ।
विश्वकै प्रख्यात पदमार्गको रूपमा स्थापित राउन्ड अन्नपूर्ण चक्रीय पदमार्ग (राउन्ड अन्नपूर्ण सर्किट)को थोरङला पास पदमार्ग विदेशी पर्यटक साहसिक पदयात्रा गर्न रुचाउँछन् ।
मनाङबाट थोरङला पासको यात्रा गर्दै मुस्ताङ आउन पदयात्रामा कुनै समस्या नहुने मुक्तिनाथ होटेल एसोसिएसनले जनाएको छ ।
