जेन–जी समूहको आन्दोलनको मौका छोपी जिल्ला कारागार कार्यालय म्याग्दीबाट फरार भएका ७० जना कैदीबन्दी कारागार फर्किएका छन् ।
आन्दोलनको समयमा कारागारबाट ७६ कैदीबन्दी फरार भएकोमा ३९ जना कैदीबन्दीका परिवार र आफन्तको सहयोगमा फर्किएको र ३१ जनालाई विभिन्न स्थानबाट पक्राउ गरिएको जिल्ला प्रहरी कार्यालय म्याग्दीका सूचना अधिकारी सागर पौडेलले बताए ।
हाल फरार भएका कर्तब्य ज्यान, लागुऔषधका कारोबारमा संलग्न सहित ६ जनाको खोजीकार्य भइरहेको प्रहरी निरीक्षक पौडेलको भनाई छ ।
कारागार परिसरभित्र अनधिकृत रुपमा प्रवेश गरी त्यहाँ रहेका ८८ जना कैदीबन्दीहरुमध्ये ७६ जना पुरुष कैदीबन्दीलाई भगाउन सहयोग गर्नेमध्ये ७ जनालाई पक्राउ गरी कारागार ऐन २०७९ विपरीतको कसूरमा अनुसन्धानको कार्य अगाडि बढाइएको जिल्ला प्रहरी कार्यालयले जानकारी दिएको छ ।
