दिपक के श्रेष्ठः नेपाल विद्यार्थी संघका ११ केन्द्रिय सदस्यले नेपाली कांग्रेस, कास्की सभापति किशोरदत्त बरालमाथि गम्भीर आरोप लगाउँदै केन्द्रिय अनुशासन समितिसमक्ष कारवाहीको माग गरेका छन् ।
केन्द्रिय सदस्यहरुले आज पोखरामा पत्रकार सम्मेलनमार्फत सभापति बरालले पार्टीलाई बिक्रीमा राखेको भन्दै ‘नालायक’ घोषणा गरेको छ ।
स्वतन्त्र विद्यार्थी युनियनको निर्वाचनमा पश्चिमाञ्चल अध्ययन संस्थानमा नेविसंघले उम्मेदवारी दिने क्रममा सचिव पदका उम्मेदवार प्रशान्त उपाध्यायको मनोनयन पत्र नै च्यातेर कम्युनिष्ट घटकका विद्यार्थी संगठनलाई सघाएकोसमेत उनीहरुको आरोप छ ।
यसबीच संस्थानको स्ववियु निर्वाचनमा नेविसंघको उम्मेदवारीमा सचिवको समेत नामावली प्रकाशनको माग राखेर क्याम्पस गेटमा तालाबन्दी र रिले अनशन गरेको जनाउँदै उनले त्यहाँ पनि सभापति बरालले प्रहरीलाई बल प्रयोग गर्न लगाएको बताए ।
सोहीक्रममा बरालकाे निर्देशनमा प्रहरी प्रशासन लगाएर अनशनमा बसेका विद्यार्थीलाई लखेट्न्, दोहोरो भिडन्त गराउने, र मुलगेटमा लगाइएको ताला फुटाउने काम गरेको केन्द्रिय सदस्य राजेन्द्र बरालले बताए ।
स्ववियु निर्वाचनमा सभापति बरालले चन्दा उठाएको तर कुनैपनि क्याम्पसका विद्यार्थीलाई प्रचारप्रसारलगायतमा आर्थिक सहयोग नगरेको अर्का सदस्य अन्जान थापाको आरोप छ ।
यसअघि ०७९ सालको स्ववियु निर्वाचनमा पनि पैसा उठाएर कास्की कांग्रेसले विद्यार्थीलाई सहयोग नगरेको आरोप लगाउँदै अर्का सदस्य नसिब गुरुङले चुनाव हारिन्छ भन्दै निष्क्रिय बसेको, भाँड्न अभिप्रेरित गरेको बताए ।
‘कास्कीमा नेविसंघको अधिवेशन गर्न निरन्तर माग गरेपछि ०८० असोजको ३ गते पार्टी कार्यालयमा गरेको तालाबन्दी खोल्यौ’ गुरुङले भने ‘तर आजसम्म यहाँ नेविसंघको अधिवेशन हुन सकेको छैन, नयाँ नेतृत्व बन्न सकेको छैन ।’
हालै सम्पन्न स्ववियु निर्वाचनमा गरेको गुटबन्दी, आर्थिक अनियमितता र नेविसंघको जिल्ला अधिवेशन गराउन नसकेकाकारण सभापति बराल ‘नालायक’ भएको उनीहरुको टिप्पणी छ ।
केन्द्रिय सदस्यहरुले पार्टीका अनुशासन समिति संयोजक आनन्दप्रसाद ढुंगानासमक्ष सात दिनभित्र कारवाही माग गरेका छन् । अन्यथा, सशक्त आन्दोलन गर्ने उनीहरुको चेतावनी छ ।
यस विषयमा कास्की सभापतिले भने खण्डन गरेका छन् ।
सभापति बरालको खण्डन जस्ताको तस्तैः
१, क्याम्पसको निर्वाचनमा कसलाई उठाउने, कसलाई नउठाउने भन्ने विषय पार्टी कार्यालयको होइन । विद्यार्थी संघ स्वायत्त छ । उनीहरुले गर्ने कुरा हो ।
मुलतः पश्चिमाञ्चल अध्ययन संस्थानको विषयमा हामीले सविचसहित उम्मेदवारी गराउनुपर्ने भनेको थियौ । तर क्याम्पस प्रशासनले तपाइहरुको यहाँ भूमिका रहन्न, विद्यार्थीहरु जसरी आउँछन्, त्यही सदर हुन्छ भनेपछि हाम्रो केही चलेन ।
क्याम्पस प्रशासनले ‘बाहिरका मान्छेले भनेर हुँदैन’ भनि हामीलाई यस विषयमा टाढै राखिदियो । अर्काे कुरा सचिव बेच्यो भन्ने आरोप छ, मैले अथवा कास्की कांग्रेसले कसलाई बेच्यो ? कसले किन्यो ? यसको जवाफ विद्यार्थी भाइबहिनीहरु सँग होला ।
२, आर्थिक अनियमितताको कुरामा स्पष्ट भन्नुपर्दा हामी सहयोग, चन्दाबाट चल्ने पार्टी होउ । यस सन्दर्भमा विद्यार्थीहरुलाई चुनावमा खर्च आवश्यक पर्ने देखेर हामीले केही शुभचिन्तकबाट पैसा उठाएका हौं । करिब २ लाख रुपैयाँ जम्मा भएको छ । जसको हिसाबकिताब बैंक खाताले देखाउँछ ।
उक्त रकम केही क्याम्पसका विद्यार्थीलाई दिइसकेका छौं । बाँकी के–कति खर्च छ पछि बुझ्नेछौं । कास्की कांग्रेस पारदर्शितामा विश्वास गर्छ । जहाँसम्म मलाइ नालायक भनिएकाे छ, त्याे उहाँहरुकाे साेचाइ र चेतनाकाे तह हाे ।
३, रह्यो कुरा नेविसंघको जिल्ला अधिवेशनको, त्यसमा पार्टी कार्यालयले केन्द्रिय समितिको आग्रह अनुसार समन्वयमात्र गर्न सक्छ । अधिवेशन गर्ने जिम्मेवारी उनीहरुकै केन्द्रिय कार्यसमितिको हो । उनीहरु कोही कता, कोही कता धाउने अध्यक्ष हुने समानान्तर समिति चलाउने गर्दाेका परिणाम पनि हो ।
यथार्थमा भन्दा नेविसंघ जिल्ला समितिको अधिवेशन गराउने दायित्व नेपाली कांग्रेस कास्कीको होइन । उहाँहरु स्वयं केन्द्रिय समितिमा बसेर किन अधिवेशन गरिरहनु भएको छैन ? ११ सदस्य प्रेसमिट गर्नुहुन्छ तर अधिवेशन गराउनु हुँदैन, किन ?
अन्त्यमा, सभापति बरालले भने ‘कांग्रेस लोकतान्त्रिक पार्टी हो, यहाँ आफ्ना विचार राख्न, विरोध गर्न वा आलोचना गर्न छूट छ । यसले पार्टीलाई नै बलियो बनाउँछ ।’
