पर्वतको कुश्मा नगरपालिकामा प्रमुख प्रशासकीय अधिकृत हुँदा रकम हिनामिना गरेको अभियोगमा गत २० पुसमा अख्तियार दुरुपयोग अनुसन्धान आयोगबाट सफाई पाएका कुमानसिं गुरुङ्लाई कास्कीको प्रमुख जिल्ला अधिकारी (सीडीओ)को जिम्मेवारी दिइएको छ ।
अख्तियारमा मुद्दा दायर हुँदा उनी बाग्लुङको सिडिओका रूपमा कार्यरत थिए ।
आर्थिक वर्ष ०७८/७९ मा कुश्मा नगरपालिका– ७ स्थित खरेहामा ज्येष्ठ नागरिक भवन निर्माण गर्दा ठेकेदारसँग मिलेमतो गरेर भ्रष्टाचार गरेको अख्तियारको दाबी थियो ।
उनीविरुद्ध एक करोड १३ लाख ४४ हजार २१६ रुपैयाँ बिगो कायम भएको थियो ।
आव ०७८/७९ मा संघीय सरकारको विशेष अनुदान कार्यक्रमअन्तर्गत ज्येष्ठ नागरिक भवन निर्माणका लागि एक करोड ६६ लाख विनियोजन भएको थियो ।
भवन निर्माणका लागि एक करोड ४४ लाख १० हजारको लागत अनुमान तयार गरिएको थियो । ९६ लाख ३० हजारमा भवन निर्माण सम्पन्न गर्ने गरी ७ पुस ०७८ मा मल्ल कन्स्ट्रक्सन एन्ड सप्लायर्ससँग खरिद सम्झौता भएको थियो ।
२४ असार ०७९ मा निर्माण सम्पन्न गर्ने सम्झौतामा उल्लेख थियो ।
साथै, निर्माणाधीन ज्येष्ठ नागरिक भवन निर्माणमा पहिलो बिल अनुसार मूल्यांकित रकमभन्दा पेस्कीसहित १२ लाख ५६ हजार बढी भुक्तानी गरेको अख्तियारको दाबी थियो ।
मुद्दा दायर हुनुअघि नै सो रकम ठेकदारबाट दाखिला भइसकेको भन्दै अदालतले उनलाई सफाइ दिएको हो ।
हाल कार्यरत सिडिओ रुद्रादेवी शर्मालाई धनकुटा सरुवा गरिएको छ ।
