पोखरा । सहारा क्लब पोखराले इतिहास रच्दै २५औँ आहा रारा पोखरा गोल्डकपको फाइनल यात्रा तय गरेको छ ।
पोखरा रंगशालामा रोमाञ्चक प्रतिस्पर्धा र अन्तिम क्षणसम्मको तनावबीच सहाराले ए डिभिजनको बलियो टोली मनाङ मर्स्याङ्दी क्लबलाई सडेन डेथमा ७–६ ले पराजित गर्यो ।
निर्धारित ९० मिनेट र थप गरिएको अतिरिक्त समयमा दुवै टोली गोलरहित बराबरीमा रोकिएपछि खेल पेनाल्टीमा पुगेको थियो । पेनाल्टीमा पनि बराबरी भएपछि निर्णय सडेन डेथबाट गरिएको हो ।
निर्णायक क्षणमा गोलरक्षक टिकेन्द्र थापाले सविन खड्काको प्रहार उत्कृष्ट रूपमा बचाउ गर्दै सहारालाई फाइनलको ढोका खोलिदिए । उनको उत्कृष्ट प्रदर्शनले सहाराको जितको मुख्य आधार बन्यो । खेलमा सहाराका ताये डानियल बादारु ‘उत्कृष्ट खेलाडी’ घोषित भए ।
ऐतिहासिक जितसँगै सहारा क्लब पोखरा उपाधि नजिक पुगेको छ ।
अब भोलि हुने दोस्रो सेमिफाइनलमा जावलाखेल युवा क्लब र आभा एफसी बीच दिनको ३ बजे खेल हुने तालिका रहेको छ ।
