नयाँलिपिः गण्डकी प्रदेशको भौतिक पूर्वाधार विकास तथा यातायात व्यवस्था मन्त्री प्रकाशबहादुर केसीले पत्रकार सम्मेलनमार्फत सय दिनको उपलब्धी सुनाएका छन्
जसअनुसार चालु आर्थिक वर्षमा १० प्रतिशत वित्तीय र १२ दशमलव ६ प्रतिशत भौतिक प्रगति गरेको उनको भनाई छ । सय दिनमा गरिएको कामलाई ‘प्रगति’ भन्दै उनले मन्त्रालयको एक सय दिनका विभिन्न एक सय उपलब्धि समेटिएको पुस्तिका सार्वजनिकसमेत गरे ।
यस अवधिमा भएको वित्तीय तथा भौतिक प्रगति प्रदेश सरकार गठन भएयताकै हालसम्मको धेरै भएको उनले जनाए । आर्थिक वर्षको अन्तिममा हतारहतार काम गर्ने प्रवृत्तिलाई निरूत्साहित गरिनुपर्ने बताउँदै उनलेमातहतको कार्यालयका प्रमुखहरूलाई ढिलोमा पुस मसान्तसम्म ठेक्का प्रक्रियाको काम सक्न निर्देशन दिएको जानकारी गराए ।
मन्त्री केसीका अनुसार मन्त्रालयको कूल विनियोजित बजेट रू १२ अर्ब ७० करोड १६ लाख छ सय ६० मध्ये यस अवधिमा रू एक अर्ब २७ करोड १९ लाख ५९ हजार मात्र खर्च भई करिब १० दशमवलव ०१ प्रतिशत वित्तीय प्रगति भएको छ । त्यस्तै १२ दशमलव ६ प्रतिशत भौतिक प्रगति हासिल भएको छ ।
यस अवधिमा मन्त्रालयअन्तर्गतका कूल १९ वटा निकायबाट रू ७६ करोड ३९ लाख ३२ हजार तीन सय ७० राजस्व सङ्कलन भएको जानकारी दिँदै मन्त्री केसीले सबैभन्दा बढी यातायात व्यवस्था कार्यालय, सवारी कास्कीबाट रू ४३ करोड ११ लाख ८१ हजार दुई सय ७७ राजस्व सङ्कलन भएको जानकारी दिनुभयो । सहरी विकासतर्फ महेन्द्र गुफा बृहत् विकास परियोजना सम्पन्न भएको मन्त्रालयले जनाएको छ ।
मन्त्रालयका अनुुसार यस अवधिमा एक हजार आठ सय ४६ योजनामध्ये ३८ वटा सम्पन्न भइसकेका छन् भने चार सय ८५ वटा निर्माणाधीन छन् । त्यस्तै दुई सय ६५ वटा मूल्याङ्कनको चरणमा, तीन सयवटाको बोलपत्र आह्वान भएको र चार सय ८८ वटा लागत अनुमान तयार भई स्वीकृतिको चरणमा रहेको जनाइएको छ ।
वार्षिक कार्यक्रममा समावेश भएका तर योजनाको नाम, ठेगाना संशोधन गर्नुपर्ने, दोहोरोपन, स्थानीय विवादलगायत विविध कारणले दुई सय ७१ वटा योजना कार्यान्वयन हुन बाँकी रहेकोमा ती योजनाको संशोधनको प्रक्रिया अघि बढाइएको मन्त्री केसीले जानकारी दिए ।
यसबीचमा १६ दशमलव ७ किलोमिटर प्रादेशिक सडकको कालोपत्रेरपक्की सडक निर्माण कार्य सम्पन्न भएको छ भने ११ दशमलव ९३५ किलोमिटर सडक चौडा बनाउने र ग्राभेलस्तरमा स्तरोन्नति गर्ने कार्य सम्पन्न भएको छ । त्यस्तै १९ किलोमिटर सडक पक्की ढलान गर्ने कार्य सम्पन्न भएको छ ।
चाडपर्वको पूर्वसन्ध्यामा राष्ट्रिय, प्रादेशिक तथा स्थानीय सडक तत्काल मर्मत गरी सहज र सुरक्षित यात्रा हुने व्यवस्थालाई जोड दिँदै बागलुङ जिल्लाको मालढुङ्गा–गलुवा–पाक्जा सडकअन्तर्गतको दब्ल्याङ खण्ड एवं कास्की जिल्लाको नयाँपुल–घान्द्रुक सडकमा गएको पहिरोबाट अवरूद्ध सडकको पहिरो हटाएर आवश्यक मर्मतसम्भार गरी यातायात सुचारू गराइएको उनको दाबी छ ।
त्यस्तै, राइड सेयरिङलाई वैधानिकता दिन कार्यविधि तयार पार्ने काम भइरहेको उनको दाबी छ ।
