स्वास्थ्य तथा खाद्य स्वच्छता मन्त्री निशा मेहेताले सञ्चारकर्मीहरूसँग आफ्नो पद जाने विषयमा जानकारी नपाएको जवाफ दिएकी छिन् ।
केहि दिन यता सरकारले कार्यक्षमताका आधारमा मन्त्री फेरबदल हुने जनाएपछि मन्त्री मेहेतालाई पत्रकारले यसबारे सोधेका थिए ।
आइतबार मन्त्रालयका काम कारबाहीलाई थप प्रभावकारी बनाउन सञ्चारकर्मीहरूसँग छलफलमा जुटेकाबेला उनलाई मन्त्री पदबाट बिदा हुन लागेको भन्दै प्रश्न सोधिएको थियो ।
छलफलमा उनले सरकारको सय बुँदे कार्यक्रम कार्यान्वयनमा केन्द्रित हुँदा यसअघि यस्तो अन्तरक्रिया गर्न नसकिएको स्वीकार गरिन् । अब भने हरेक १५ दिन वा एक महिनाको अन्तरालमा सञ्चारकर्मीहरूसँग नियमित रूपमा छलफल गरिने उनले बताइन्।
उनले भनिन्, ‘हामीले यस्तो छलफल अलि पहिले नै गर्नुपर्ने थियो तर सरकारको सय बुँदे कार्यक्रममा ध्यान दिँदा यतातिर ध्यान दिन पाइएन । अब निरन्तर रूपमा यस्ता छलफल गर्नेछौँ। सुझाव पनि लिनेछौँ र आएका सुझाव तथा सल्लाहलाई आत्मसात गर्दै अघि बढ्नेछौँ ।’
कार्यक्रममा सञ्चारकर्मीहरूले मन्त्रालयका काम कारबाही, स्वास्थ्य सेवा, खाद्य स्वच्छता तथा स्वास्थ्य वीमालगायत विषयमा विभिन्न सुझाव दिएका थिए। मन्त्री मेहेताले मन्त्रालयका कमी–कमजोरीबारे उठेका विषयलाई पनि सकारात्मक रूपमा लिँदै सुधारका लागि पहल गरिने बताइन्।
त्यस्तै मन्त्रालयका सचिव डा. विकास देवकोटाले स्वास्थ्य बीमा सुधार सरकारको प्राथमिकतामा परेको बताए । उनले आगामी आर्थिक वर्षमा स्वास्थ्य बीमा कार्यक्रमका लागि बजेट उल्लेखनीय रूपमा बढाइएको जानकारी दिए।
उनले भने, ‘बीमा सुधारको विषय अहिले सरकारको प्राथमिकतामा परेको छ । विगतका वर्षमा करिब साढे सात अर्ब रुपैयाँ बजेट विनियोजन हुने गरेकोमा आगामी वर्षका लागि १५ अर्ब रुपैयाँ बजेट छुट्याइएको छ । त्यसैले स्वास्थ्य बीमा क्षेत्रमा सुधार हुने अपेक्षा गरेका छौँ । ’
उनले स्वास्थ्य बीमा कार्यक्रमलाई प्रभावकारी, दिगो र नागरिक मैत्री बनाउन मन्त्रालयले आवश्यक सुधारका कदम अघि बढाइरहेको पनि जानकारी दिए।
सञ्चारकर्मीहरूसँगको छलफलबाट प्राप्त सुझावहरूले स्वास्थ्य क्षेत्रका नीति तथा कार्यक्रमलाई थप परिष्कृत बनाउन सहयोग पुग्ने विश्वास मन्त्रालयको रहेको उनले बताए।
