नेपाल विद्यार्थी संघको अध्यक्षमा धनकुटाकी करुणा कटुवाललाई पार्टीले नेतृत्व दिएको छ । केन्द्रीय कार्यसम्पादन समितिले दिएको म्याण्डेटअनुसार पार्टी सभापति गगन थापाले कटुवाललाई नेतृत्व सुम्पेका हुन् ।
नेविसंघको स्थापना वि.सं. २०२७ सालमा भएयता महिलाले नेतृत्व पाएको पहिलो पटक हो ।
त्यस्तै, समितिले नेपाल तरुण दलको अध्यक्षमा काठमाडौंका मनिष कोइराला र नेपाल महिला संघको अध्यक्षमा चितवनकी मीना खरेललाई नियुक्त गरेका छन्।
उनीहरूलाई महाधिवेशन गराउनेगरी जिम्मेवारीसहित नयाँ जिम्मेवारी दिइएको जनाइएको छ । नेविसंघको २०७३ पछि महाधिवेशन हुन सकेको छैन । तरुण दलको पनि २०७३ पछि नियमित अधिवेशन हुन सकेको छैन । नेपाल महिला संघको पनि २०७३ पछि महाधिवेशन हुन सकेको छैन ।
यसअघि कांग्रेस केन्द्रीय कार्यसम्पादन समिति बैठकले १३ वटा भ्रातृ संस्थामध्ये पाँच वटाको कार्यसमिति विघटन गरेको थियो । कांग्रेसले महाधिवेशन सम्पन्न गर्न तदर्थ समिति गठन गरिएका भ्रातृ संस्थाहरूलाई २०८१ चैत्र मसान्तभित्र महाधिवेशन गर्नै पर्ने र गर्न नसकेमा स्वतः पदावधि समाप्त हुने समयसीमा दिएको थियो ।
तर, पार्टीले दिएको कार्यादेश अनुसार निर्देशक समिति बनाउँदा पनि महाधिवेशन गर्न नसकेको र अधिवेशन समेत गर्न सक्ने आधार नदेखिएपछि केन्द्रीय कार्यसमितिले म्याद नथप्दा पाँच भ्रातृ संगठनका केन्द्रीय कार्यसमिति स्वतः विघटन भएका थिए ।
