पोखरा । पोखरामा जारी साफ यू–१९ महिला च्याम्पियनसिप फूटबलमा नेपाली टोलीले पहिलो जित हात पारेको छ ।
पोखरा रंगशालामा सोमबार भएको दोस्रो खेलमा नेपाली टोलीले भुटानमाथि २–१ गोल पराजित गर्दै जित हासिल गरेको हो ।
त्यसअघि, सोमबार नै खेलिएको खेलमा बंगलादेशले भारतलाई २–० गोलले हराएको थियो ।
जारी प्रतियोगितामा भारतको यो पहिलो हार हो ।
प्रतियोगिताको पहिलो दिन शनिबार खेलिएको खेलमा भारतले आयोजक नेपाललाई १–० गोलले पराजित गरेको थियो ।
शनिबार नै खेलिएको खेलमा बंगलादेशले भुटानमाथि १२–० गोलको विशाल अन्तरको जित हासिल गरेको थियो ।
नेपालले आफ्नो अन्तिम खेल बुधबार बंगलादेशसँग खेल्नेछ ।
सोही दिन भारतले आफ्नो अन्तिम खेल भुटानसँग खेल्नेछ । त्यसपछि अंक तालिकाको माथिल्लो दुई स्थानमा रहने टोली प्रतियोगिताको फाइनलमा प्रवेश गर्नेछन् ।
हाल चारवटै टोलीले दुई/दुई खेल खेलिसक्दा ६ अंकसहित बंगलादेश पहिलो, तीन अंकसहित नेपाल दोस्रो, तीन अंकसहित भारत तेस्रो र खाता खोल्न नसकेको भुटान चौथो स्थानमा छन् । फाइनल खेल फेब्रुअरी ७ तारिखमा खेलिने छ ।
