‘जीएलसी अन्तरकलेजीय हाजिरीजवाफ’को उपाधि साउथवेस्टर्न स्टेटलाई

ग्लोबल लिड कन्सल्टेन्सी (जीएलसी) को आयोजनामा सम्पन्न प्रथम ‘जीएलसी अन्तरकलेजीय हाजिरीजवाफ प्रतियोगिता–२०८२’ को उपाधि साउथवेस्टर्न स्टेट कलेजले जितेको छ।

काठमाडौंको बसुन्धरास्थित जीएलसी भवनमा मंसिर ११ र १२ गते सञ्चालित दुईदिने प्रतियोगिता बिहीबार भव्य रूपमा सम्पन्न भएको हो।

प्रतियोगितामा काठमाडौं उपत्यकाका ८ कलेजका विद्यार्थी समूहले सहभागिता जनाएका थिए।

विज्ञान, व्यवस्थापन, समसामयिक विषयवस्तु, खेलकुद तथा नेपालको सामान्य ज्ञानमा आधारित प्रश्नहरूमा उत्कृष्ट प्रदर्शन गर्दै साउथवेस्टर्न स्टेट कलेजका ललिशा बनियाँ, सुसान्त सापकोटा र आशुतोषको समूह प्रथम भएको हो।

उपाधिसँगै विजेता टोलीले ५ हजार रुपैयाँ नगद, ट्रफी र प्रमाणपत्र प्राप्त गरेको छ।

त्यस्तै, प्रतियोगितामा हेराल्ड कलेजले दोस्रो र तेस्रो दुवै स्थानमा कब्जा जमाउन सफल भयो। आयुष्मा, अशिब र गणेश सम्मिलित हेराल्डको टोलीले दोस्रो स्थान हासिल गर्दै ३ हजार रुपैयाँ पुरस्कार पायो भने कृष्ण, आशिष र बिनिताको टोलीले तेस्रो हुँदै २ हजार रुपैयाँसहित ट्रफी र प्रमाणपत्र प्राप्त गर्यो।

कार्यक्रमको समापन समारोहमा प्रमुख अतिथि हिसानका केन्द्रीय सचिव राजेन्द्र प्रसाद अधिकारी र विशेष अतिथि टोखा नगरपालिका वडा नं. ५ का अध्यक्ष मदन गुरुङले विजयी विद्यार्थीहरूलाई पुरस्कार तथा प्रमाणपत्र वितरण गरेका थिए।

अतिथिहरूले यस्ता शैक्षिक कार्यक्रमले विद्यार्थीको वृत्तिविकासमा महत्त्वपूर्ण भूमिका खेल्ने बताउँदै आगामी दिनमा पनि सहकार्य र सहयोग गर्ने प्रतिबद्धता व्यक्त गरे।

लाङटाङ स्किल्स एकेडेमीको सहकार्यमा आयोजित कार्यक्रममा एकेडेमीका प्रबन्ध निर्देशक ज्ञानेन्द्रबहादुर कार्की अतिथिको रूपमा उपस्थित थिए।

कार्यक्रममा जीएलसीका विनोद आचार्यले स्वागत मन्तव्य राखेका थिए भने सीईओ मिसन बास्कोटाले संस्थाको भावी योजना र उद्देश्यमाथि प्रकाश पारेका थिए। कार्यक्रम संयोजक सन्देश आचार्यले प्रतियोगिताको समग्र समन्वय र सञ्चालन गरेका थिए।

विद्यार्थीहरूमा प्रतिस्पर्धात्मक क्षमता र सामूहिक कार्यको सीप विकास गर्ने उद्देश्यले आयोजित यस प्रतियोगिताप्रति विद्यार्थीहरूले उत्साहजनक प्रतिक्रिया दिएका छन्।

जीएलसीले आगामी दिनमा पनि यस्ता सिर्जनात्मक तथा शैक्षिक कार्यक्रमहरूलाई निरन्तरता दिने घोषणा गरेको छ।

Exit mobile version