नेपालस्थित भारतीय दूतावासले विभिन्न ४८ वटा जिल्लाका ८१ विद्यालयलाई १/१ वटा स्कुल बस वितरण गरेको छ ।
नेपाल–भारतबीचको दीर्घकालीन विकास साझेदारी र मित्रतालाई सुदृढ बनाउने उद्देश्यले कोशी प्रदेशका बाढी प्रभावित इलाम, झापा र उदयपुरसहित सातै प्रदेशका ४८ जिल्लास्थित शैक्षिक संस्थाहरूलाई ८१ वटा स्कुल बसहरू उपहारस्वरूप प्रदान गरिएको हो।
यी बसहरू हुम्ला, मुस्ताङ, संखुवासभा, दार्चुला, बैतडी र अछाम जस्ता दुर्गम जिल्लाका विद्यालयहरूमा पनि वितरण गरिने दूतावासले जनाएको छ।
विगत तीन दशकमा भारत सरकारले नेपालका विभिन्न शैक्षिक संस्थाहरूलाई जम्मा ३८१ वटा स्कुल बसहरू उपलब्ध गराइसकेको छ ।
जसले नेपाल–भारतबीचको मित्रता र सहयोगको सम्बन्धलाई अझ मजबुत बनाएको काठमाडौंस्थित भारतीय दूतावासले उल्लेख गरेको छ ।
