नयाँलिपिः पोखरा महानगरपालिकाबाट हटाइएका करार कर्मचारीहरु सर्वोच्च अदालतको आदेश अनुसार कार्यालयमा पुनः हाजिरी गर्न पाउनुपर्ने मागको सुनुवाई नभएपछि आज महानगरको स्वास्थ्य महाशाखामा तालाबन्दी गरेका छन् ।
हटाइएका कर्मचारीले तालाबन्दीपश्चात् ९ बुँदे मागसहितको ब्यानर टाँसेर आन्दोलनको अर्काे चरण सुरु भएको बताएका छन् ।
महानगर परिसरमा उनीहरुले दैनिक ३ घण्टा धर्ना दिएको ७० दिनसम्म कुनै सुनुवाई नभएपछि तालाबन्दीमा उत्रन बाध्य भएको ‘करार स्वास्थ्यकर्मी संघर्ष समिति’ सदस्य विशाल पौडेलले बताएका छन् ।
महानगरपालिकाले सर्वोच्च अदालतको अल्पकालीन अन्तरिम आदेशलाई कार्यान्वयन नगरेपछि कर्मचारी आन्दोलित भएका हुन् ।
गत माघ १ गते पदमुक्त भएका कर्मचारीले थमौतीको माग गर्दै सर्वोच्चमा रिट निवेदन दर्ता गरेकोमा अदालतले तत्काल कर्मचारी नहटाउन अल्पकालीन अन्तरिम आदेश जारी गरेको हो ।
सर्वोच्चले गत मङ्सिर २८ गते ‘विशेष नगरसभाले गरेको निर्णयलाई यथास्थितिमा राख्नु’ भन्ने आदेश जारी गरेको छ ।
करार सेवाबाट हटाइएका स्वास्थ्य क्षेत्रका ५९ कर्मचारीले अदालतको सोही आदेश अनुसार आफूहरुले हाजिरी भएर कामकाज गर्न पाउनुपर्ने माग गरिरहेका छन् ।
आन्दोलित उनीहरुले हाजिरीको मागसँगै आन्तरिक प्रतिष्पर्धाको मागसमेत गरेका छन् ।
पौडेल भन्छन् ‘महानगरले हामीलाई हटाएर सोही शाखा र क्षेत्रमा १ सय ७० पदमा आवेदन खोलेको छ, हामीले आन्तरिक प्रतिष्पर्धा गर्न पाउनुपर्छ ।’
