पाेखरा: नेपालले आज (शुक्रबार) श्रीलंका सँग खेलेर एसीसी यू–१९ एसिया कपमा आफ्नो यात्रा सुरु गर्दैछ ।
यूएईमा आजै अर्को खेलमा अफगानिस्तान र बंगलादेश आमनेसामने हुनेछन् । नेपाल र श्रीलंकाबीचको खेल शारजहास्थित शारजहाँ क्रिकेट स्टेडियममा हुनेछ । यूएईको शारजाहाँमा खेल नेपाली समय अनुसार बिहान पौने ११ बजे शुरू हुने छ ।
चारवटै टोली समूह ‘बी’ मा रहेका छन् । समूह ‘ए’ मा भारत, पाकिस्तान, यूएई र जापान छ । समूहको शीर्ष दुई टोली सेमिफाइनल पुग्नेछन् । एकदिवसीय अन्तर्राष्ट्रिय खेलिसकेका हेमन्त धामीको नेतृत्वमा रहेको नेपालसामु यसपालि भने कठिन चुनौती छ
श्रीलंकाले सन् २०१८ र २०२१ मा गरी दुई पटक फाइनल खेलिसकेको छ । तर, पछिल्लो पटक श्रीलंकालाई उछिन्दै यूएई सेमिफाइनल पुगको थियो । एसियाली क्रिकेट परिषद् (एसीसी)ले आयोजना गर्ने यो प्रतियोगितामा नेपालले सन् २०१२ देखि निरन्तर खेल्दै आएको छ ।
सन् २०१७ को संस्करणमा भारत माथि १९ रनको विजय हात पार्दै नेपाल सेमिफाइनल पुगेको थियो ।
