भारतको राजधानी नयाँदिल्लीमा मुख्य निर्वाचन आयुक्त ज्ञानेश कुमारविरुद्ध प्रदर्शन गर्न पुगेका कक्रोच जनता पार्टी (सीजेपी) का तीन नेतालाई अदालतले रिहा गर्न आदेश दिएको छ । यसैबीच, चर्चित युट्युबर ध्रुव राठीले आफूलाई प्रहरीले पक्राउ नगरी ‘अपहरण’ गरेको दाबी गरेका छन् ।
दिल्लीस्थित कार्यकारी मजिस्ट्रेट अदालतले आइतबार सीजेपीका नेता अभिजीत दिप्के, सौरभ दास र आशुतोष रंकालाई एक वर्षसम्म शान्ति भंग हुने गतिविधिमा संलग्न नहुने सर्तमा रिहा गर्न आदेश दिएको हो ।
दिल्ली प्रहरीले उनीहरूले एक वर्षसम्म शान्ति र सद्व्यवहार कायम राख्ने प्रतिबद्धतासहित ५० हजार भारतीय रुपैयाँको जमानतपत्र पेस गरेको जनाएको छ ।
मुख्य निर्वाचन आयुक्त ज्ञानेश कुमारविरुद्ध प्रदर्शन गर्न शनिबार राजधानी दिल्ली पुगेका उनीहरूलाई प्रहरीले नियन्त्रणमा लिएको थियो ।
यसैबीच, युट्युबर ध्रुव राठीले आफूलाई दिल्ली प्रहरीले हिरासतमा लिएको नभई अपहरण गरेको दाबी गरेका छन् । उनको यो भनाइ प्रदर्शनका क्रममा भएको प्रहरी कारबाहीबारे थप विवाद उत्पन्न गर्ने विषय बनेको छ ।
जंतरमंतरमा जारी प्रदर्शनका बीच भारतको सर्वोच्च अदालतले मेट्रो सेवा सामान्य रूपमा सञ्चालन गर्ने, इन्टरनेट सेवा पुनःस्थापना गर्ने, सर्वसाधारणको स्वतन्त्र आवागमन सुनिश्चित गर्ने तथा वकिलहरूलाई आफ्नो व्यावसायिक जिम्मेवारी निर्वाह गर्न दिने विषयमा अन्तरिम आदेश जारी गर्ने जनाएको छ ।
प्रदर्शनकारीमाथि गरिएको प्रहरी कारबाही र त्यसपछि विकसित घटनाक्रमले दिल्लीमा राजनीतिक तथा कानुनी बहसलाई थप चर्काएको छ ।एजेन्सी
