भोटेकोशीमा आएको आकस्मिक बाढीबाट प्रभावित रसुवाका परिवारका लागि तेस्रो चरणको राहत सामग्री पठाइएको छ।
आइएनएफ नेपाल, असल छिमेकी नेपाल र पोखरेली क्रिश्चियन समुदायको संयुक्त पहलमा उत्तरगया गाउँपालिका–१ र २ का ४ सय प्रभावित परिवारलाई लक्षित गरी राहत सामग्री पठाइएको हो।
राहत सामग्रीमा अत्यावश्यक खाद्यान्न, सरसफाइ तथा स्वच्छता सामग्री, ओछ्यानका सामग्री र कपडालगायतका वस्तु रहेका छन्। स्थलगत रूपमा प्राप्त जानकारीअनुसार बाढीबाट अत्यधिक प्रभावित क्षेत्रमध्ये एक उत्तरगया–१ मा अझै राहत सामग्री पुग्न सकेको छैन।
उक्त क्षेत्रमा ६ सयभन्दा बढी मानिस अझै बेपत्ता रहेको बताइएको छ।
रसुवा पुग्न अहिले पनि निकै कठिनाइ भइरहेको छ। सडकका विभिन्न खण्डमा क्षति पुगेको तथा केही स्थानमा सडक अवरुद्ध भएका कारण राहत सामग्री प्रभावित क्षेत्रमा पुर्याउन चुनौती देखिएको छ। कतिपय प्रभावित बस्ती अझै बाहिरी सम्पर्कबाट कटेका छन्।
बाढी प्रभावित धेरै समुदायमा विद्युत्, सञ्चार तथा आधारभूत सम्पर्क सेवामा समेत अवरोध आएको छ। यसले प्रभावित परिवारको वास्तविक आवश्यकता र स्थलगत अवस्थाबारे समयमै जानकारी प्राप्त गर्न कठिनाइ भइरहेको राहतमा संलग्न संस्थाहरूले जनाएका छन्।
यी चुनौतीका बीच प्रभावित समुदायसम्म सम्भव भएसम्म पुग्ने प्रयास भइरहेको छ। आइएनएफ नेपालका प्रतिक्रिया टोलीका सदस्य एस्थर गुरुङ र पृथ्वी राज बराल एसीएनका टोली सदस्यसँगै राहत सामग्री बोकेका ट्रकमा रसुवातर्फ प्रस्थान गरेका छन्।
उनीहरू यसअघि नै प्रभावित क्षेत्रमा खटिएका राहत तथा स्वास्थ्य टोलीसँग जोडिनेछन्।
राहत टोलीले स्थानीय प्रशासन तथा समुदायका प्रतिनिधिसँग निरन्तर समन्वय गर्दै प्रभावित क्षेत्रका बदलिँदा आवश्यकता पहिचान गर्ने र राहत सामग्री सुरक्षित तथा उपयुक्त ढंगले वितरण गर्ने काम गरिरहेको जनाएको छ।
त्यस्तै, आइएनएफ नेपालले बाढी प्रभावित समुदायसँग उभिन सहयोग गर्ने साझेदार तथा आफ्नो अन्तर्राष्ट्रिय सञ्जालप्रति आभार व्यक्त गरेको छ।
बाढीबाट प्रभावित परिवार, विशेषगरी आफ्ना आफन्तको अवस्थाबारे अझै जानकारी पर्खिरहेका परिवारलाई समेत निरन्तर सम्झन संस्थाले आग्रह गरेको छ।
‘हामी प्रभावित समुदायसँगै छौँ’ भन्ने प्रतिबद्धतासहित राहत तथा उद्धार प्रयासलाई निरन्तरता दिइने जनाइएको छ।
