फिफा विश्वकप २०२६ मा १०४ मध्ये ७२ खेल सम्पन्न हुँदा प्रि क्वार्टरफाइनल पुग्ने ३२ टिमको टुंगो लागेको छ । पहिलो पटक ४८ राष्ट्र विश्वकपमा सहभागी हुँदा समूह चरणमा कुल दुई सय १५ गोल भएका छन् । औसतमा एक खेल बराबर २.९९ गोल भएका छन् ।
अर्जेन्टिनाका कप्तान लियोनल मेसीले सर्वाधिक ६ गोल गरेका छन् । मेसीसँग फ्रान्सका औसमाने डेम्बेले र क्यानाडाका जोनाथन डेविडले ह्याट्रिक गरेका हुन् ।
आइतबार बिहानका खेलसँगै यसपटक प्रि क्वार्टरफाइनलमा जर्मनी पाराग्वे, फ्रान्स, स्विडेन, दक्षिण अफ्रिका, क्यानाडा, नेदरल्यान्ड्स, मोरक्को, पोर्चुगल, क्रोएसिया, स्पेन, अस्ट्रिया, अमेरिका, बोस्निया एण्ड हर्जगोभिना, बेल्जियम, सेनेगल, ब्राजिल, जापान, आइभरी कोष्ट, नर्वे, मेक्सिको, इक्वेडर, इंग्ल्यान्ड, डिआर कंगो, अर्जेन्टिना, केप भार्डे, अस्ट्रेलिया, इजिप्ट, स्विजरल्यान्ड, अल्जेरिया, कम्बोडिया र घानाले अन्तिम ३२ मा स्थान बनाएका हुन् ।
४८ राष्ट्र सहभागी हुँदा फिफाको नियमअनुसार १२ समूहबाट विजेता र उपविजेतासहित सिधै २४ टिमलाई नकआउट चरणमा स्थान बनाएका थिए । त्यसपछि फिफाले उत्कृष्ट तेस्रो स्थानमा आउने समूहको एक टिमलाई पनि नकआउटमा स्थान दियो ।
सोही अनुसार ८ टिम यसपटक तेस्रो भएर पनि भाग्यमानी बने । कंगोसहित चार अंक जोडेका स्विडेन, घाना, इक्वेडर, बोस्निया, अल्जेरिया, पाराग्वे र तीन अंक जोडेको सेनेगल यसपटक नकआउटमा पुगेका छन् । उत्कृष्ट तेस्रोमै स्थान बनाए पनि इरान, दक्षिण कोरिया, स्कटल्यान्ड र उरुग्वे भने अन्तिम समयमा बाहिरिए ।
कस्को प्रतिस्पर्धी को ?
आइतबार बिहानको खेलसँगै अब प्रिक्वार्टरफाइनल समीकरण पनि पुरा भएको छ ।
क्वार्टरफाइनलमा स्थान बनाउन जर्मनी र पाराग्वे, फ्रान्स र स्विडेन, दक्षिण अफ्रिका र क्यानाडा, नेदरल्यान्ड्स र मोरक्को, पोर्चुगल र क्रोएसिया, स्पेन र अस्ट्रिया, अमेरिका र बोस्निया एण्ड हर्जगोभिना, बेल्जियम र सेनेगल, ब्राजिल र जापान, आइभरी कोष्ट र नर्वे, मेक्सिको र इक्वेडर, इंग्ल्यान्ड र डिआर कंगो, अर्जेन्टिना र केप भार्डे, अस्ट्रेलिया र इजिप्ट, स्विजरल्यान्ड र अल्जेरिया, कम्बोडिया र घानाले प्रतिस्पर्धा गर्नेछन् ।
समूह ‘ए’ बाट सह आयोजक मेक्सिको ९ अंकसहित विजेता र ४ अंकको दक्षिण अफ्रिका उपविजेता भए । तीन अंक जोडेको कोरिया र चेक गणतन्त्र घर फर्किएका छन् । समूह ‘बी’ बाट ७ अंकको स्विजरल्यान्ड तथा समान चार अंक जोडेका क्यानडा र बोस्निया पनि नकआउटमा स्थान बनाउँदा एक अंकको कतार भने बाहिरिएको छ ।
समूह ‘सी’ बाट समान सात अंक जोड्दै बलियो टोलीहरु ब्राजिल र मोरक्को अन्तिम ३२ मा स्थान बनाए । तीन अंक जोडेको स्कटल्यान्ड र बिना अंकको हाइटी भने बाहिरिएका छन् । समूह ‘डी’ बाट सह आयोजक अमेरिका र एसियाली अस्ट्रेलिया तथा पाराग्वे दोस्रो चरणमा प्रवेश गरेका हुन् । तीन अंक जोडेको टर्की भने बाहिरियो ।
समूह ‘इ’ मा रहेको जर्मनी दुई संस्करणपछि पहिलो पटक नकआउटमा स्थान बनाउन सफल भयो । समान ६ अंक भएपनि आइभरी कोष्ट उपविजेता बन्यो । चार अंक जोडेको इक्वेडर पनि माथि बढ्दा पहिलो पटक सहभागी भएको कुराकाओ बाहिरियो ।
समूह ‘एफ’ बाट पनि तीन टोलीहरु नेदरल्यान्ड्स ७ अंक, जापान ५ र चार अंक जोडेको स्विडेन अगाडि बढेका छन् । ट्युनिसिया भने लगातार चार खेलमा पराजित हुँदै बाहिरियो ।
समूह ‘जी’ मा समान पाँच अंक जोडेका बेल्जियम र इजिप्ट क्रमशः समूह विजेता र उपविजेता भए । तीन अंक जोडेको इरान अन्तिम समयमा उत्कृष्ट तीनमा स्थान बनाउन सकेन । एक अंक जोडेको न्युजिल्यान्ड पनि घर फर्कियो ।
समूह ‘जी’ बाट स्पेन र पहिलो पटक सहभागी भएको केप भर्डेले नकआउटमा स्थान बनाए । स्पेनले ७ अंक जोड्दा केप भर्डेले तीन खेलमा तीन अंक जोड्यो । दुई पटकको च्याम्पियन उरुग्वे र साउदी अरेबिया भने यो समूहमा अभागी बने ।
समूह ‘आइ’ मा अपराजित हरँदै फ्रान्स विजेता बन्यो । नर्वे ६ अंकसहित दोस्रो र ३ अंकको सेनेगल पनि नकआउटमा स्थान बनाउन सफल भयो । लगातार तीन खेलमा पराजित इराक भने बाहिरिएकोे थियो ।
समूह ‘जे’ मा तीनै खेल जितेको अर्जेन्टिना विजेता बन्यो । समान चार अंक जोडेका अस्ट्रिया र अल्जेरिया पनि नकआउटमा स्थान बनाएका हुन् । जोर्डन भने लगातार तेस्रो हार बेहोर्न पुग्यो ।
समूह ‘के’ बाट सात अंकको कोलम्बिया विजेता, पाँच अंकको पोर्चुगल दोस्रो तथा कंगो चार अंकसहित उत्कृष्ट तेस्रो बन्यो । पहिलो पटक विश्वकप खेलेको उज्वेकिस्तानले एकै खेल जित्न सकेन ।
समूह ‘एल’ बाट ७ अंकसहित इंग्ल्यान्ड पहिलो, ६ अंकको क्रोएसिया दोस्रो र चार अंकको घाना तेस्रो हुँदै अन्तिम ३२ मा स्थान बनाएका हुन् । एकै खेल नजितेको पानामा भने अघिल्लो चरणमा स्थान बनाउन सकेन ।
