सन् २०२२ को कतार विश्वकप जितेपछि कप्तान लियोनेल मेसीले अन्तर्राष्ट्रिय फुटबलबाट किन संन्यास लिएनन् भन्ने प्रश्न गर्नेहरूका लागि उनले मैदानबाटै कडा जवाफ दिएका छन् ।
आफ्नो ३९ औँ जन्मदिन मनाउन ठीक एक साता बाँकी रहँदा मेसीले बुधबार बिहान फिफा विश्वकपको समूह ‘जे’ को पहिलो खेलमा अल्जेरियाविरुद्ध सानदार ह्याट्रिक गर्दै आफ्नो पुरानो लयलाई पुनः मैदानमा उतारे ।
यो प्रदर्शनसँगै उनले आफ्ना चिरपरिचित प्रतिद्वन्द्वी क्रिस्टियानो रोनाल्डोको एउटा ठूलो कीर्तिमान समेत आफ्नो नाममा गरेका छन् । मेसी विश्वकप इतिहासमै ह्याट्रिक गर्ने सबैभन्दा पाको खेलाडी बनेका छन्, जुन रेकर्ड यसअघि रोनाल्डोको नाममा थियो ।
अमेरिकाको कान्सास सिटी स्टेडियममा अर्जेन्टिनालाई ३–० को सानदार जित दिलाउने क्रममा मेसीले देशका लागि ऐतिहासिक २०० औँ खेल खेल्दै विश्वकप इतिहासमै आफ्नो पहिलो ह्याट्रिक पूरा गरे ।
यस ऐतिहासिक प्रदर्शनसँगै आठ पटकका ब्यालोन डी’ओर विजेता मेसीले विश्वकप इतिहासमा आफ्नो गोल सङ्ख्या १६ पुर्याउँदै जर्मनीका पूर्वस्ट्राइकर मिरोस्लाभ क्लोजको सर्वकालीन कीर्तिमान बराबरी गरेका छन् ।
अब मेसी विश्वकप इतिहासकै सबैभन्दा धेरै गोल गर्ने खेलाडीको सूचीमा संयुक्त रूपमा शीर्ष स्थानमा उक्लिएका छन् ।
चार वर्षअघि अर्जेन्टिनालाई विश्वको शिखरमा पुर्याएपछि पनि अन्तर्राष्ट्रिय फुटबल खेलिरहने मेसीको निर्णयमाथि धेरै चर्चा भएका थिए ।
तर, यस खेलले उनी यस पटकको विश्वकपमा केवल संख्या बढाउन मात्र नभई अर्जेन्टिनालाई चौथो पटक विश्वविजेता बनाउने दृढ संकल्पका साथ मैदान उत्रिएको प्रमाणित गरेको छ ।
विश्वकपको इतिहासमा साविक विजेताका रूपमा मैदान उत्रिँदा अर्जेन्टिनाले आफ्नो पहिलो खेल जितेको यो पहिलो पटक हो ।
यसअघि सन् १९८२ र १९९० मा डिफेन्डिङ च्याम्पियनका रूपमा खेल्दा अर्जेन्टिना पहिलो खेलमै पराजित भएको थियो । त्यस्तै, मेसी विश्वकपका छ वटा फरक संस्करण खेल्ने विश्वकै पहिलो खेलाडी समेत बनेका छन् ।
खेलको १७ औँ मिनेटमा मेसीले इन्टर म्यामीका सहकर्मी रोड्रिगो डे पउलको पासमा २५ यार्ड टाढाबाट उत्कृष्ट कर्लिङ सटमार्फत अर्जेन्टिनालाई सुरुवाती अग्रता दिलाएका थिए ।
फ्रान्सेली फुटबल लेजेन्ड जिनेदिन जिदानका छोरा तथा अल्जेरियाका गोलरक्षक लुका जिदानले मेसीको उक्त प्रहारलाई रोक्न सकेनन् ।
खेलको ६० औँ मिनेटमा अलेक्सिस म्याक अलिस्टरको कडा प्रहारलाई गोलरक्षक जिदानले नियन्त्रणमा लिन नसक्दा रिबाउन्ड भएको बललाई मेसीले आफ्नो दायाँ खुट्टाले पोस्टको दिशा दिँदै अग्रता दोब्बर बनाए ।
खेलको ७६ औँ मिनेटमा निकोलस गोन्जालेजको पासमा डिबक्सको किनाराबाट मेसीले शक्तिशाली सटमार्फत गोल गर्दै आफ्नो कीर्तिमानी ह्याट्रिक पूरा गरे ।
अब आगामी सोमबार अर्जेन्टिनाले समूह चरणको आफ्नो दोस्रो खेलमा अस्ट्रियाको सामना गर्नेछ ।
क्लोजको कीर्तिमान बराबरी गरिसकेका मेसीले अस्ट्रियाविरुद्ध गोल गर्दै विश्वकप इतिहासकै एकल शीर्ष गोलकर्ता बन्ने पूर्ण सम्भावना रहेकाले आगामी सोमबार पुनः सम्पूर्ण फुटबल विश्वको नजर मेसीकै प्रदर्शनमा रहनेछ ।
