सुरज श्रेष्ठ/पोखरा । पोखरास्थित गण्डकी मेडिकल कलेज (जीएमसी) ले न्युरोसर्जरी क्षेत्रमा उल्लेखनीय सफलता हासिल गरेको छ । वरिष्ठ न्युरोसर्जन डा.यमबहादुर रोकाको नेतृत्वमा ६–७ सदस्यीय विशेषज्ञ टोलीले करिब १३ घण्टा लामो जटिल मस्तिष्क शल्यक्रिया सफलतापूर्वक सम्पन्न गर्दै ४३ वर्षीय पदमबहादुर पुनको ज्यान बचाएको हो ।
म्याग्दीका पुन विगत केही महिनादेखि कडा टाउको दुखाइ, आँखा सुन्निने, आँखा झ्याप्प बन्द हुने तथा हिँडडुल गर्दा हातखुट्टामा कमजोरी महसुस हुने समस्याबाट पीडित थिए। उपचारका लागि उनी पोखराको हिमालयन आँखा अस्पताल पुगेका थिए। आँखाको परीक्षणमा समस्या नदेखिएपछि त्यहाँका चिकित्सकले एमआरआई गर्न सुझाव दिएका थिए ।
राम्रो अस्पताल र अनुभवी न्युरोसर्जनको खोजी गर्दै जाँदा डा.यमबहादुर रोकाको नामबारे जानकारी पाएपछि पुन जीएमसी पुगेका थिए । जीएमसीमा गरिएको एमआरआई परीक्षणबाट उनको मस्तिष्कको ‘सीपी एङ्गल’ क्षेत्रमा ट्युमर रहेको पुष्टि भयो ।
चिकित्सा भाषामा यसलाई ‘अकोस्टिक न्युरोमा’ भनिन्छ। कानको सुन्ने नसाबाट उत्पन्न हुने यस प्रकारको ट्युमरका कारण बिरामीमा सुन्ने क्षमतामा कमी आउने, मुख बाङ्गिने, बान्ता हुने, कडा टाउको दुख्ने तथा हिँडडुल गर्न गाह्रो हुने जस्ता लक्षण देखिन्छन् । सीपी एङ्गल क्षेत्रमा गरिने शल्यक्रिया अत्यन्तै संवेदनशील र जोखिमपूर्ण मानिन्छ ।
डा.बिपिन बजागाईसहितको विशेषज्ञ टोलीले निरन्तर १३ घण्टा प्रयास गरी ट्युमर सफलतापूर्वक हटाएको थियो । डा.रोकाका अनुसार पोखरामै पहिलो पटक यस प्रकृतिको जटिल सीपी एङ्गल ट्युमरको शल्यक्रिया सफलतापूर्वक सम्पन्न भएको हो ।
शल्यक्रियापछि बिरामीको स्वास्थ्यमा उल्लेखनीय सुधार देखिएको छ । केही दिन अस्पतालमै निगरानीमा राखी उपचार गरिएको पुन हाल सामान्य अवस्थामा फर्कँदै छन् । चिकित्सकले केही समय सवारी साधन नचलाउन र नियमित फलोअप जाँचमा आउन सल्लाह दिएका छन् ।
बिरामीका भतिज त्रिनेत्र पुन मगरले सफल उपचारप्रति खुसी व्यक्त गर्दै भने, “धेरै ठाउँ धाउँदा पनि रोग पत्ता लागेको थिएन । यहाँ आएपछि काकाको रोग पत्ता लाग्यो र सफल शल्यक्रिया भयो । हामी डा.रोका र सम्पूर्ण चिकित्सक टोलीप्रति निकै आभारी छौं ।”
अस्पताल प्रशासनका अनुसार अत्याधुनिक प्रविधि र अनुभवी चिकित्सकको उपलब्धताले जीएमसीलाई जटिल न्युरोसर्जरीका लागि पोखराको भरोसायोग्य केन्द्रका रूपमा स्थापित गरेको छ। यस सफल शल्यक्रियाले निजी क्षेत्रका मेडिकल कलेजहरूले पनि विश्वस्तरीय स्वास्थ्य सेवा प्रदान गर्न सक्छन् भन्ने सन्देश दिएको जनाइएको छ ।
