नेपाली कम्युनिष्ट पार्टी (नेकपा)को वृहत एकता सन्देश सभामा संयोजक पुष्पकमल दाहाल प्रचण्डले सत्ताको ध्वाँस देखाउनेलाई जेनजीको आन्दोलनले गतिलो जवाफ दिएको बताएका छन् ।
पार्टीको गण्डकी प्रदेश सभाद्वारा आज पोखरामा आयोजित सभालाई सम्बोधन गर्दै संयोेजक प्रचण्डले एमाले र कांग्रेसले दुई तिहाईको आडमा देखाएको दम्भ खरानी भएको उल्लेख गरे ।
‘दुई तिहाईले के के नै गर्छाै भन्थे, लुखुरलुखुर भाग्नु पर्यो, खरानी भएको देख्न पर्यो’ उनले भने । माओवादीले उठाएका मागलाई जेनजीले पुरा गरेको भन्दै उनले धन्यवादसमेत व्यक्त गरे ।
सम्बोधनकैक्रममा प्रचण्डले वामशक्तिबीचको एकता अपरिहार्य भएको बताए । सोही अनुसार बृहद कम्युनिष्टबीच एकता भएको उनको भनाई छ ।
‘हाम्रो एकता केवल आगामी चुनावमा बहुमत ल्याउनमात्र हो भन्ने नबुझ्नु होला’ प्रचण्डले भने ‘देशकै स्वाधीनता बचाउँन हामीबीच एकता भएको हो ।’
सरकारले तोकेको मितिमै निर्वाचन हुने बताउँदै उनले नेकपा पनि चुनावकै पक्षमा भएको बताए । ‘हामी चुनावबाट भाग्ने कुरै छैन, व्यवस्था र संविधान जोगाउन पनि चुनाव हुनैपर्छ’ उनले भने ।
सभामा माधवकुमार नेपाल, झलनाथ खनाल, गुरुङ, नारायणकाजी श्रेष्ठलगायतले सम्बोधन गरेका छन् ।
