नेपाल प्रिमियर लिग (एनपिएल) अन्तर्गत कीर्तिपुरस्थित त्रिवि क्रिकेट मैदानमा शनिबार लुम्बिनी लायन्सले पोखरा एभेन्जर्सलाई ३ विकेटले पराजित गरेको छ।
पोखराले दिएको १५१ रनको लक्ष्य लुम्बिनीले १९.४ ओभरसम्म खेल्दै ७ विकेटको क्षतिमा रोमाञ्चक जित हात पारेको छ ।
लक्ष्य पछ्याउने क्रममा लुम्बिनी लायन्सको सुरुवात मिश्रित रह्यो। ओपनर सुमित महर्जन (०) र डार्सी सर्ट (७) सस्तैमा आउट भए पनि कप्तान रोहित पौडेल र निरोशन डिकवेलाले इनिङ सम्हालेका थिए।
विकेटकिपर ब्याटर निरोशन डिकवेलाले आक्रामक ब्याटिङ गर्दै २२ बलमा ३७ रन बनाए। यस क्रममा उनले २ छक्का र २ चौका प्रहार गरे।
कप्तान रोहित पौडेलले जिम्मेवारीपूर्ण ब्याटिङ गर्दै ३६ बलमा ४० रनको योगदान दिए। मध्यक्रममा गुल्बादिन नाइबले १७ रन बनाए।
खेल अन्तिम समयमा रोमान्चक मोडमा पुगेको बेला सन्दीप जोराले नटआउट २५ रन बनाउँदै टोलीलाई जित दिलाए। उनले २ चौका र १ छक्का प्रहार गरे।
पोखराका बलरहरू विपीन खत्री, म्याट टेलर र सागर ढकालले समान २-२ विकेट लिए पनि टोलीलाई हारबाट जोगाउन सकेनन्।
विपीन खत्रीले ४ ओभरमा जम्मा १८ रन खर्चेर कसिलो बलिङ गरेका थिए।
यसअघि टस हारेर ब्याटिङको निम्तो पाएको पोखरा एभरेन्जर्सले निर्धारित २० ओभरमा ५ विकेट गुमाउँदै १५० रन बनाएको थियो।
पोखराको सुरुवात निकै खराब रह्यो। इनिङको चौथो ओभरसम्म पुग्दा १५ रन जोड्दा २ विकेट गुमिसकेको थियो। कप्तान कुशल भुर्तेल र सुमित वर्मा खाता नखोली पेभेलियन फर्किए।
३३ रनमा ४ विकेट गुमाएर दयनीय अवस्थामा पुगेको पोखरालाई एडम रोसिङटन र जेम्स निसमले उकासेका थिए।
एडम रोसिङटनले उत्कृष्ट ब्याटिङ गर्दै ६३ बलमा ८१ रन बनाए। उनले आफ्नो पारीमा ७ चौका र ५ छक्का प्रहार गरे।
त्यस्तै, जेम्स निसमले ३२ बलमा ३ चौका र ३ छक्कासहित अविजित ५१ रनको अर्धशतकीय पारी खेले।
यी दुईबीच पाँचौं विकेटका लागि शतकीय साझेदारी भएको थियो।
लुम्बिनीका बलर शेर मल्ल र तिलक भण्डारीले समान २-२ विकेट लिए भने गुल्बादिन नाइबले १ विकेट हात पारे।
