अर्थोपेडिक एंव स्पोर्टस मेडिसिन विशेषज्ञ डा. पदमबहादुर खड्काले नेपाली खेलाडीले पाउनुपर्ने स्वास्थ्य सेवा नपाएको बताएका छन् ।
कुनैपनि खेलाडीको नियमित स्वास्थ्य परीक्षण र उसको रेकर्ड कुनैपनि खेलसम्बद्ध संस्थासँग नभएको बताउँदै ‘स्पोर्टस मेडिसिन’बारे अवगत गराउन आवश्यक भएको बताएका छन् ।
राजधानीबाट सञ्चालित एक अनलाइन टिभीसँगको कुराकानीमा निजी अस्पतालहरूको संस्था एशोसिएसन अफ प्राइभेट हेल्थ इन्स्टिच्युट अफ नेपाल (अफिन)का अध्यक्ष समेत रहेका डा. खड्काले खेल क्षेत्रमा खेलाडी नभई पार्टीका कार्यकर्ता हावी भएकाले स्पोर्टस मेडिसिनलाई महत्व नदिइएको बताए ।
‘खेलकुदमा खेलाडी कम पार्टीका कार्यकर्ताको संख्या बढी छ’ डा. खड्काले भनेका छन् ‘भर्ति केन्द्र भएकाले कार्यकर्तालाई स्पोर्टस् मेडिसिनबारे जानकारी छैन ।’
त्यस्तै, कोहीपनि असल खेलाडी वा असल प्रशिक्षक हुँदैमा अवसर नपाइने भन्दै उनले त्यसकालागि पार्टीको ‘झोले’, ‘टीके’को योग्यता आवश्यक भएको तीतो पोखेका छन् ।
खेलकुद केवल प्रतिष्पर्धामात्र नभएर विज्ञान भएको बताउँदै डा. खड्काले मेडिकल स्पोर्टस विशेषज्ञ वा प्राक्टिसनरको संलग्नता अपरिहार्य भएको बताएका छन् ।
नेपालमा प्रायः प्रशिक्षकनै सर्वेसर्वा भएको दृष्टान्त प्रस्तुत गर्दै उनले स्पोर्टस विशेषज्ञलेमात्रै कुन खेलाडीले कति खेल्न सक्ने, खेल्न हुने–नहुने र खेलाडीको शारीरिक क्षमतालाई मापन गर्नसक्ने बताए ।
खेलाडीलाई नियमित शारीरिक परीक्षणको आवश्कताका रहेको बताउँदै उनले खेलाडी घाइते भएपछि पात्रै उपचार र विशेषज्ञ सेवा पाउने प्रावधानले खेलकुदमा नतीजा दिन नसक्ने उनको भनाई छ ।
खेल क्षेत्रमा न सरकार न त सम्बन्धित संस्थाले खेल चिकित्सकहरुको महत्वलाई बुझ्न नसेकोमा खड्काको गुनासो छ ।
यद्यपि, पछिल्लो सयम खेलकुद परिषद्ले केही प्रयास सुरु गरेकोप्रति उनी सकारात्मक सुनिएका छन् ।
सातदोबाटो स्पोर्टस साइन्स ल्याब र स्पोर्टस मेडिसिन एण्ड रिसर्च सेन्टरलगायतले खेलाडीको शारीरिक क्षमताको मापन र रेकर्ड राख्न सुरु गरिहाल्नुपर्ने उनको धारणा छ ।
‘केही संस्थाले काम गर्न सुरु गरेका छन्, यसलाई सकारात्मक लिनुपर्छ’ डा. खड्का भन्छन् ‘फुटबलको एन्फा, क्रिकेटको क्यानजस्तै सम्बन्धित संस्थाले खेलाडीको स्वास्थ्य रेकर्ड राखेर प्रशिक्षणमा नियमितता दिनु जरुरी छ ।’
