पोखराको सार्वजनिक यातायातलाई व्यवस्थित र वातावरणमैत्री बनाउन विद्युतीय सवारी साधन (इमोबिलिटी) परियोजना सञ्चालन गरिने भएको छ।
एसियाली विकास बैंक (एडीबी) को ४ करोड अमेरिकी डलर (करिब ५ अर्ब ३० करोड रुपैयाँ) बराबरको सहयोगमा यो महत्त्वाकांक्षी परियोजना सञ्चालन हुन लागेको हो।
यसै सम्बन्धमा गण्डकी प्रदेश सरकार, पोखरा महानगरपालिका, विकास साझेदार र यातायात व्यवसायीसहितका सरोकारवालाबीच एक कार्यशाला सम्पन्न भएको छ।
कार्यशालामा पोखराको सार्वजनिक यातायात सुधारका लागि विद्युतीय सवारीमा जोड, चार्जिङ स्टेसन निर्माण, डिजिटल सूचना प्रणाली र व्यवस्थित बस स्टप पूर्वाधार निर्माण लगायतका विषयमा छलफल भएको थियो।
एसियाली विकास बैंक र ग्रिन क्लाइमेट फन्डको साझेदारीमा नेपालका लागि कुल १० करोड अमेरिकी डलर बराबरको परियोजना सञ्चालन हुन लागेकोमा पोखराले त्यसको ४ करोड डलर हिस्सा पाएको हो।
पोखरालाई नेपालको पर्यटन राजधानी घोषणा गरिएसँगै एडीबीले यहाँको यातायात व्यवस्थापनमा विशेष चासो देखाएको छ। यसअघि नगर प्रमुख धनराज आचार्यले मनिलास्थित एडीबीको मुख्यालयमा समेत यो परियोजनाबारे छलफल गरेका थिए।
नगर प्रमुख आचार्यले परियोजनाको स्थानीय व्यवस्थापन र समन्वयको जिम्मा महानगरपालिकाले लिने बताए।
यो परियोजनाले पोखराको सार्वजनिक यातायातलाई व्यवस्थित बनाउनुका साथै वातावरण संरक्षणमा समेत महत्त्वपूर्ण योगदान गर्ने उनले विश्वास व्यक्त गरे। उनले यातायात व्यवसायीहरूलाई सेवाको गुणस्तर सुधार गर्दै पर्यावरणप्रति सचेत बन्न आग्रह गरे।
यसैबीच, गण्डकी प्रदेश सरकारले पोखरासहित समग्र प्रदेशको सार्वजनिक यातायात व्यवस्थापन गर्न प्राधिकरण गठनका लागि कानुनी संरचना निर्माणको तयारी गरेको छ।
परियोजनाबारे भइरहेको छलफलमा एसियाली विकास बैंकका वरिष्ठ सार्वजनिक व्यवस्थापन विशेषज्ञ अरुण रामामुर्तिको नेतृत्वमा एक प्रतिनिधि मण्डल सहभागी भएको छ।
