पोखरा महानगरपालिकाद्धारा निर्मित आप्रवासी सहायता स्रोत केन्द्र (सहायता कक्ष)को जिल्ला प्रशासन कार्यालय कास्की परिसरमा शुभारम्भ गरिएको छ ।
उक्त केन्द्रको प्रमुख जिल्ला अधिकारी रुद्रादेवी शर्मा र नगर प्रमुख आचार्यले सेवा शुभारम्भ गरेका छन् ।
प्रमुखआचार्यले राहदानी बनाउन जाने व्यक्तिहरूलाई विदेश जानु पूर्व दिइने आवश्यक परामर्श सेवाका लागि एक व्यवस्थित सहायता कक्ष निर्माण भएको बताए ।
केन्द्रमार्फत वैदेशिक रोजगारीमा जानेहरूलाई आवश्यक परामर्श र वैदेशिक रोजगारीमा रहेका व्यक्तिहरूको परिवारका लागि वित्तीय साक्षरता समेतका सवालमा परामर्श सेवा दिइने उनको भनाई छ ।
सहायता कक्ष राहदानी शाखाको नजिकै निर्माण गरिएकाले त्यसको प्रयोजन, आवश्यकता र औचित्यका सन्दर्भमा समेत काउन्सिलिङ गर्न सहज हुने प्रमुख जिल्ला अधिकारी शर्माले बताइन् ।
सेवाग्राहीहरूको सुविधाका लागि संरचना निर्माणमा पोखरा महानगरपालिकाले गरेको सहयोग प्रति उनले आभारसमेत व्यक्त गरिन् ।
सेवाग्राहीहरूले विश्राम गर्ने फल्चा सहित सहायता कक्ष निर्माणमा पोखरा महानगरपालिकाले १६ लाख रुपैयाँ खर्च गरेको छ । नागरिकहरूको सेवाका लागि सहज हुने विश्वास गरिएको छ ।
पोखरा महानगरपालिकाका रोजगार संयोजक विष्णुप्रसाद दाहाल र सुरक्षित आप्रवासन कार्यक्रमका जिल्ला संयोजक आदिमध्वज श्रेष्ठले महानगरपालिकाको तर्फबाट श्रम तथा रोजगारको क्षेत्रमा समन्वय गरिरहेका छन् ।
