दिपक के श्रेष्ठ
पूर्वी तराई मोरङमा ०४७ साल भदौ २३ गते जन्मिएका नितिज राई हाल कास्की जिल्ला अदालतमा न्यायाधीश रहेका छन् । उनै न्यायाधीशको हातमा रहेको छ मुलुककै चर्चित सूर्यदर्शन सहकारी ठगी मुद्दाको किनारा लगाउने जिम्मा ।
चर्चित त यसकारण भएको छ, जहाँ आरोपी बनाइएका छन् रवि लामिछाने । लामिछानेको भाग्य फैसला यही शुक्रबारसम्म न्यायाधीश नितिजले गर्नेछन् । जन्मका हिसाबले नितिज मात्र ३५ वर्ष पुगेर मुलुककै कान्छा न्यायाधीश बनेका छन् । र, उनको हातमा मुलुककै ध्यान खिच्ने मुद्दा र व्यक्ति छन् ।
न्यायिक क्षेत्रमा उपसचिव भएको ३ वर्षपछि मात्रै न्यायाधीश हुने प्रावधान रहेपनि सेक्सन अफिसरबाटै नितिज लोकसेवा आयोग लडेर न्यायाधीश भएका हुन् ।
देशभर २ सय ८२ जिल्ला न्यायाधीश कार्यरत रहेकोमा उनी २४५ औं वरियताक्रममा छन् । उनी गत असारमा मात्रै लिखित परीक्षा उत्तीर्ण गरेर न्यायाधीश भएका हुन् ।
त्यतिबेला ४२ जना न्यायाधीशका लागि परीक्षा भएकोमा १२ जनामात्रै पास भएका थिए, त्यसमध्येका एक थिए नितिज । अब नितिजले रविलाई पुर्पक्षका लागि थुन्ने, धरौटीमा छाड्ने वा साधारण तारेखमा छाडेर मुद्दा लड्ने भन्नेबारे अन्तिम आदेश दिनेछन् ।
बयानको पहिलो दिन न्यायाधीश नितिजले रविलाई ‘स्वास्थ्यवस्था कस्तो छ ?’ भनि प्रश्न गरेका थिए । बयानमा उपस्थित स्रोतका अनुसार मुलायम प्रश्नबाट सुरु भएको बयान क्रमशः तात्दै गएको थियो । सहकारीसम्बन्धी विविध प्रश्नमा रविले एकपछि अर्काे इन्कारी बयान दिँदै गएका थिए ।
रविले आफुमाथि राजनीतिक प्रतिशोध साँधिएको भन्दै बाराम्बार इन्कारी बयान दिएपछि नितिजले चेतावनी शैलीमा त्यस्ता शब्द प्रयोग नगर्न भनेका थिए । पहिलो दिनको सत्रमा सामान्य चर्काचर्की भएकैबेला रवि पक्षधरका कानून व्यवसायीले मोबाइल प्रयोग गर्ने, तस्बिर लिने गरेपछि एकजना बाहेक अन्यलाई उनले बाहिर निकालेका थिए ।
झट्ट हेर्दा सामान्य र अपत्यारिला देखिने न्यायाधीश नितिजको उक्त दिनको कार्यशैली हेर्दा उनी नरम र गरम दुबै हुनसक्ने कानूनी ज्ञाता रहेको सहभागीको बुझाई छ ।
त्यसो त रविलाई थुनामा पठाइए वा धरौटीमा छाडिए पनि त्यसपश्चात् चर्चा र प्रसिद्धि भने न्यायाधीश नितिजकै पोल्टामा रहनेछ ।
