दसैं , तिहार र छठजस्ता ठुला चाडपर्वहरू नजिकिदै गर्दा पृथ्वी राजमार्ग बस सञ्चालक कम्पनी प्राईभेट लिमिटेडले दसैंका लागि यहि असोज २१ गते आईतबारदेखि अग्रिम टिकट बुकिङ खुलाउने जानकारी दिएको छ ।आएको र चाडपर्वको अवसरमा आफ्ना आफन्तहरुकोमा आवत जावत गर्ने संस्कृति एवं परम्परा अनुसार आफ्नो गन्तव्यमा जानका लागि अग्रिम टिकटको बारेमा जानकारी लिने क्रम बढ्दो भएको अनुभूति गरेका छौं भनेर प्रेस विज्ञप्तिमा उल्लेख गरिएको छ ।
यसअघि पृथ्वी राजमार्ग बस सञ्चालक कम्पनीले भाडा बृद्धि नभएसम्म अग्रिम टिकट बुकिङ नखुलाउने अडान लिएको थियो । पोखरा–मुग्लिन सडक खण्ड, नारायणगढ–बुटवल सडक खण्डको स्तरोन्नतीको काम भइरहेकाले सडक जिर्ण भएको, जिर्ण बाटोमा बस चलाउँदा सवारी साधनको पार्टपुर्जा, ईञ्जिन, गियर बक्सहरु खराब भई पटक÷पटक मर्मतसम्भार गर्नुपर्ने, पेट्रोलियम पदार्थमा भएको मूल्यबृद्धि, पार्टपुर्जामा भएको बृद्धि, मूल्य बृद्धिलगायतको अनुपातमा यातायात भाडा न्यून भएकाले भाडा समायोजन गर्नुपर्ने अडानमा कम्पनी थियो ।
तर दशैं मुखैमा आएपछि यात्रुहरुको आवश्यक्ता, मर्म, भावना र सुविधालाई मध्यनजर गर्दै अग्रिम टिकट बुकिङ खुल्ला गरिएको कम्पनीका अध्यक्ष योगेन्द्रबहादुर केसीद्वारा शनिबार जारी विज्ञप्तीमा जनाइएको छ । कम्पनीले जारी गरेको विज्ञप्तीमा भनिएको छ,‘हाम्रो मुलुकमा अहिले सरकार दृष्टिविहीन, अपाङ्ग र बहिरो जस्तो मूर्तिको आकार लिई उदासिन भएर बसेको अवस्थामा चाडपर्वका बखत यात्रुहरुको आवश्यकता, मर्म, भावना र सुविधालाई मध्यनजर गर्दै गैह्रजिम्मेवार र उदासीन बन्न हाम्रो नैतिकताले नदिने हुँदा घाटा सहेर भएपनि अग्रिम टिकट बुकिङ खोल्ने निर्णयमा पुगेका छौं ।’
कम्पनीले दशैंका लागि अग्रिम टिकट बुकिङ पोखरा–८ फिर्के र कम्पनीका अन्य सेवा प्रदायक कार्यालय अन्तर्गतका काउण्टरहरुबाट उपलब्ध हुने जनाएको छ ।
कम्पनीले दशैंका लागि गाडी थप्ने योजना रहेकोपनि जनाएको छ । तर यात्रुको आवश्यक्ता हेरेर गाडी थपिने अध्यक्ष केसीले जानकारी दिए । यसपाली गाडीको समस्या हुँदैन,उनले भने,‘आवश्यक्ता अनुसार गाडी थप्छौं । गाडी नपाएर यात्रु रोकिने स्थिति आउन दिदैनौं ।’
कम्पनीका गाडीहरु पोखरादेखि काठमाडौं, बुटवल, पूर्वको ईटहरी, धरान, विराटनगर, धनकुटा, झापाको दमक, काकडभिट्टा, ईलामको पशुपतीनगर, भारतको दार्जिलिङ, सिक्किमसम्म जाने गरेको छ ।
