नयाँलिपिः पोखराको बाराहीघाटमा शुक्रबार मानवसेवा फाउण्डेशनले भुमि पूजनकाक्रममा भएको झडपमा वडा २६ का अध्यक्ष नरेन्द्र थापासमेत मुठभेडमा उत्रिएको दृश्य सार्वजनिक भएपछि उनी आलोचित भएका छन् ।
आलोचनापछि वडाध्यक्ष थापाले नगर प्रहरी, महिला प्रहरीमाथि निर्मम हमला भएपछि प्रतिरक्षामा उत्रिएको बताएका छन् ।
‘महानगरको आदेश पालन गर्ने क्रममा खटिएका नगरप्रहरी माथि आयोजकले भाडामा राखेका हतियारधारी समूहले आफ्नै आँखा अगाडी निर्घात कुटपिट गर्न थाल्नु र अझ महिला नगरप्रहरी माथि हातपात गरेपछि एक जनप्रतिनिधि हुनुको नाताले महानगरको कार्यपालिकाको निर्णय कार्यान्वयन र आफ्ना कर्मचारीको सुरक्षा एवं धर्मको नाउँमा भएको अपराध रोक्नु मेरो धर्म पनि हो’ थापाले भनेका छन् ।
थापाले सामाजिक सञ्जालमा लेखेका छन् ‘हामी हाम्रो हिन्दु धर्म रक्षा र संरक्षणका लागि अन्तिम श्वास रहेसम्म लड्न तयार छौं तर हतियारधारी जत्था तयार गरी अपराधिक शैलीमा गरिने यस्ता अराजकता र हिन्दु धर्मलाई बद्नाम गराउने कार्य सहन, टुलुटुलु हेर्न र हुन दिनेछैनौ ।’
थापाको स्पष्टीकरण एवं अपीलः
सुन्दर र शान्त पर्यटकीय क्षेत्र पोखरामा धर्मका नाउँमा मानव सेवा फाउण्डेशनलले शुक्रबार जुन धार्मिक अराजकता र ताण्डव मच्चायो त्यसमा मेरो गंभिर ध्यानाकर्षण भएको छ । वास्तविकता नवुझी उक्त घट्नामा मेरो नाम र पद जोडेर जुन भाष्य निर्माण गरिएको छ, त्यो आधारहिन छ ।
भक्तजनहरुको सहभागितामा पवित्र मानिएको कोटीहोम जस्तो धार्मिक कार्यको शुरुवात हुनुपर्नेमा रड, लाठी, खुकुरी र खुँडा सहितका हतियारधारी राखेर भूमिपूजन गर्नुले आयोजकले भिडन्तको पूर्वसंकेत दिएको अवस्था हो ।
महानगरको आदेश पालन गर्ने क्रममा खटिएका नगरप्रहरी माथि आयोजकले भाडामा राखेका हतियारधारी समूहले आफ्नै आँखा अगाडी निर्घात कुटपिट गर्न थाल्नु र अझ महिला नगरप्रहरी माथि हातपात गरेपछि एक जनप्रतिनिधि हुनुको नाताले महानगरको कार्यपालिकाको निर्णय कार्यान्वयन र आफ्ना कर्मचारीको सुरक्षा एवं धर्मको नाउँमा भएको अपराध रोक्नु मेरो धर्म पनि हो ।
हामी हिन्दु धर्मका अनुयायीहरु अधर्म र धार्मिक अपराध एवं ठगीमा विश्वास गर्दैनौ । मेरो वडामा धर्म, कला संस्कृतीको संरक्षणका लागि रकम विनियोजन गरेर जिर्णोदार, मर्मत संभार र पुर्ननिर्माण जस्ता कार्यलाई अगाडी बढाउनुको साथै पाटीपौवा, चौतारा, ताल तलैया र पोखरीको संरक्षण आज पनि हाम्रो प्राथमिकतामा छन् ।
हामी हाम्रो हिन्दु धर्म रक्षा र संरक्षणका लागि अन्तिम श्वास रहेसम्म लड्न तयार छौं तर हतियारधारी जत्था तयार गरी अपराधिक शैलीमा गरिने यस्ता अराजकता र हिन्दु धर्मलाई बद्नाम गराउने कार्य सहन, टुलुटुलु हेर्न र हुन दिनेछैनौ । फेवाताल जत्तिकै शान्त पोखरालाई धर्मको आधारमा विभाजित गर्ने दुस्प्रयास न आज न भोलि सह्य हुँदैन ।
धर्मको नाउँमा वर, पिपल र समीका रुख काट्ने परम्परा न हाम्रो धर्ममा हिजो थियो न आज । त्यसको विरोध हामीले यसअघि नै गरेका थियौ । सहमतिका आधारमा कोटीहोमलाई स्थानान्तरण गर्न सकिने बिषयलाई आयोजकले गंभिरतापूर्वक नलिई कमाउने खेलोमा लाग्दा यि घट्नाको शुत्रपात भएको भन्ने लाग्दछ ।
धार्मिक कार्यमा रणमैदान बनाउने र शान्त पोखराको वातावरण बिगार्नेका विरुद्ध एक जुट हुन सम्पूर्ण पोखराबासी एवं हिन्दु धर्ममा आस्था राख्ने महानुभावमा सादर अपिल गर्दछु । यस अगाडी जेजस्तो परिस्थिति सिर्जना भएपनि अवका दिनमा स्थानीय प्रशासनले यस घट्नालाई गंभिरता पूर्वक लिई सामान्यकरण गराउने वातावरण मिलाउन आग्रह गर्दछु । यि घट्नाका बिषयमा सामाजिक सञ्जाल, मिडिया वा विभिन्न माध्यमबाट जे जस्ता प्रतिक्रिया आए पनि धार्मिक व्यक्तित्वहरुलाई पर्न गएको असुविधा प्रति दुःख व्यक्त गर्न चाहान्छु ।
मनुस्मृतिमा लेखिएको छ, स्वाध्यायनित्यमध्यानं तपः शौचं दमः शमः। अहिंसा सत्यवचनं ब्राह्मणस्यैव धर्मतः॥
यसको अर्थ : ब्राह्मणले नित्य रूपमा वेदाध्ययन गर्नुपर्छ, तपस्या, शुद्धता, इन्द्रिय संयम, अहिंसा, र सत्य बोल्नुपर्ने धर्म हुन्छ। यी श्लोक अनुसार, ब्राह्मण केवल जन्मको आधारमा होइन, आफ्नो गुण, आचरण र कर्म अनुसार नै योग्य ठहरिन्छ ।
धर्मो रक्षति रक्षितः
साथै आज मार्च ८ गते अन्तराष्ट्रिय नारी दिवशको समस्त नारीहरु प्रति हार्दिक शुभकामना व्यक्त गर्दछु । साथै धर्म रक्षाका लागि माता दुर्गा भवानीका स्वरुपमा अगाडी बढ्न समेत अनुरोध गर्दछु ।
नरेन्द्र थापा नरेन
कार्यपालिका सदस्य
एवं वडा अध्यक्ष पोखरा २६
