‘पोखरा भ्रमण वर्ष २०२५’ को घोषणा समारोहको उद्घाटनकाक्रममा शनिबार बेलुन पड्किएको घटनाउपर छानबीन हुने भएको छ ।
उ
क्त घटनाको छानबीन गर्न गृहमन्त्री रमेश लेखकले मन्त्रीस्तरको निर्णयमार्फत कास्कीका प्रमुख जिल्ला अधिकारी भरतमणि पाण्डेको संयोजकत्वमा आठ सदस्यीय छानबिन समिति गठन गरेका छन् ।
समितिमा पोखरा महानगरपालिकाका प्रमुख प्रशासकीय अधिकृत शिवराज चौलागाई, कास्कीका प्रहरी प्रमुख प्रहरी उपरीक्षक श्यामबाबु ओलिया, सशस्त्र प्रहरीका २४ नम्बर गण हेटक्वाटरका प्रमुख सशस्त्र प्रहरी उपरीक्षक सूर्यप्रसाद तिमिल्सिना, राष्ट्रिय अनुसन्धान जिल्ला कार्यालयका उप अनुसन्धान निर्देशक सुरेश कुमार तिवारी सदस्य र कास्कीका सहायक प्रमुख जिल्ला अधिकारी गङ्गाबहादुर क्षेत्री सदस्य सचिव रहेका छन् ।
त्यस्तै, समितिमा एक जना विस्फोटक पदार्थ विज्ञ पनि राखिने पोखरा महानगरले जनाएको छ ।
समितिलाई घट्नाको विस्तृत छानबिन गरी आगामी दिनमा यस प्रकारका कार्यक्रम गर्दा अपनाउनु पर्ने पूर्वसर्तकता र अवलम्बन गर्नुपर्ने उपाय सहितको प्रतिवेदन पेस गर्न १५ दिनको समय दिइएको छ ।
घटनामा उपप्रधान एवं अर्थमन्त्री विष्णु पौडेल र पोखरा महानगरपालिकाका प्रमुख धनराज आचार्य घाइते भएका छन् ।
हाल कीर्तिपुर अस्पतालमा उपचाररत अर्थमन्त्री पौडेल र नगर प्रमुख आचार्यको अवस्था सुधारोन्मुख रहेको अस्पतालले जनाएको छ ।
