तीन साता पूरा हुँदा पनि दर्शकको साथ नछुटेपछि ‘पेन्सन पट्टा’ले बक्स अफिसमा नयाँ उचाइ छोएको छ ।
दयाहाङ राई अभिनीत यो फिल्मले स्वस्तिमा खड्काको ‘लालीबजार’लाई पछि पार्दै यस वर्षको दोस्रो सर्वाधिक कमाउने नेपाली फिल्मको रेकर्डको नाममा पारेको हो ।
प्रदर्शनको २६औँ दिनमा फिल्मले स्वस्तिमा खड्काको ‘लालीबजार’ को लाइफटाइम कलेक्सनलाई उछिन्दै नयाँ रेकर्ड बनाएको हो ।
चलचित्र विकास बोर्डको तथ्यांकअनुसार मंगलबारसम्म ‘पेन्सन पट्टा’ले ९ करोड ३४ लाख रुपैयाँ ग्रस कलेक्सन गरेको छ ।
गत वैशाख २५ गते प्रदर्शनमा आएको ‘लालीबजार’ले आफ्नो प्रदर्शन अवधिभर ९ करोड ३२ लाख रुपैयाँ कमाएको थियो । यससँगै ‘पेन्सन पट्टा’ले २ लाख रुपैयाँले ‘लालीबजार’लाई पछि पारेको हो ।
गत भदौ २६ गतेदेखि प्रदर्शनमा आएको यो फिल्म अहिले चौथो सातामा चलिरहेको छ । सुरुवाती दिनदेखि नै दर्शकको राम्रो साथ पाउँदै आएको फिल्मले प्रदर्शनको तीन साता पूरा गरिसक्दा पनि कमाइमा गति कायम राखेको देखिन्छ ।
यो वर्षको बक्स अफिसमा भने ‘गौँथली’ अझै शीर्ष स्थानमा छ। फिल्मले कुल २६ करोड रुपैयाँ ग्रस कलेक्सन गर्दै वर्षकै सर्वाधिक कमाउने नेपाली फिल्मको रेकर्ड आफ्नो नाममा राखेको छ ।
माओत्से गुरुङको लेखन तथा निर्देशनमा बनेको ‘पेन्सन पट्टा’ सामान्य मनोरञ्जनमा मात्र सीमित छैन । फिल्मले लाहुरे जीवनशैलीसँग जोडिएका पारिवारिक उतारचढाव, सम्बन्धभित्रका जटिलता र भावनात्मक पीडालाई कथाको केन्द्रमा राखेको छ। यही सामाजिक र भावनात्मक पक्षले फिल्मलाई दर्शकमाझ जोड्न महत्त्वपूर्ण भूमिका खेलेको देखिन्छ।
फिल्ममा दयाहाङ राईसँगै गौमाया गुरुङ मुख्य भूमिकामा छन् । विल्सन विक्रम राई, बुद्धि तामाङ, पशुपति राई, विश्वास गुरुङ, माया गुरुङ, पुष्करबहादुर गुरुङ, लुनीभा तुलाधर र सुरज तमुलगायत कलाकारको पनि अभिनय रहेको छ। स्वर्गीय अभिनेता सुनील थापाको अभिनयलाई समेत दर्शकले फिल्ममा देख्न पाएका छन्।
