गण्डकी प्रदेशका औषधि व्यवसायीले ‘औषधि ऐन, २०३५’ मा भएको संशोधनका केही प्रावधान अव्यावहारिक भएको भन्दै आज विरोधका कार्यक्रम आयोजना गरेका छन् ।
औषधि व्यवसायी संघले आज स्वास्थ्य मन्त्रालयमा धर्नापश्चात् स्वास्थ्य सचिवलाई ज्ञापनपत्र बुझाउँदै उक्त संशोधित ऐन पुनःसंशोधन गर्न माग गरेको छ ।
संघ गण्डकीका अध्यक्ष केशरी तिवारीले औषधि ऐनमा गरिएको संशोधनले पेसागत सुरक्षामाथि प्रतिकूल प्रभाव पार्ने र व्यवसायको अस्तित्वमै प्रहार गरेकाले आन्दोलनमा उत्रिन बाध्य भएको बताएका छन् ।
राज्यले नीति नियमन गर्ने भन्दा पनि व्यवसायीलाई त्रसित बनाएर पलायन गराउने खालको भएको अध्यक्ष तिवारीले बताए ।
संशोधित ऐनअनुसार औषधि पसलको दर्ता नवीकरणको म्याद सकिएको भोलिपल्टदेखि शतप्रतिशत जरिवाना लागू हुने र ३१औँ दिनसम्म पनि नवीकरण नभएमा सो संस्था स्वतः खारेज हुने प्रावधान राखिएको छ ।
संघले विवादित ऐन खारेज नभए फार्मेसी बन्द गरेर थप आन्दोलन गर्ने चेतावनी दिएको छ ।
