पोखरा । नेपाल खेलकुद पत्रकार मञ्च गण्डकीले आगामी वैशाख १८ गते आयोजना गर्ने १० औं पोखरा स्पोर्टस् अवार्डको तयारी गरेको छ ।
सोमबार मञ्चको आयोजनामा अवार्ड तयारीका लागि सदस्यहरु तथा पत्रकार सम्बद्ध संघसस्थाहरुका प्रतिनिधिबीच भेला सम्पन्न भयो ।
मञ्च अध्यक्ष एमबि आस्थाको अध्यक्षतामा बसेको भेलाले विभिन्न १० उपसमिति गठन गरेको महासचिव परशुराम शर्माले जानकारी दिए । अवार्डको मूल आयोजक समिति संयोजकमा अध्यक्ष एमबि आस्था तथा सहसंयोजकमा उपाध्यक्षद्वय राजाराम पौडेल र उमा आले छन् ।
आर्थिक उपसमिति संयोजक जिम्मेवारी कोषाध्यक्ष विमलप्रसाद तिवारीलाई दिइएको छ ।
यसैगरी, प्रचारप्रसार संयोजकमा महासचिव परशुराम शर्मा र सहसंयोजक पूर्व महासचिव विजय नेपाल छन् ।
स्वागत तथा अतिथि सत्कारमा निवर्तमान अध्यक्ष दीननाथ बराल, अन्तर्राष्ट्रिय समन्वय उपसमिति संयोजकमा पूर्व अध्यक्ष प्रेमनारायण न्यौपाने, मञ्च व्यवस्थापन तथा सांस्कृतिक उपसमिति संयोजकमा सहसचिव राजु गिरी चयन भए ।
फोटो तथा भिडियो व्यवस्थापनको जिम्मेवारी कार्यसमिति सदस्य गीता रानाले पाए । अनुगमन तथा मूल्यांकन उपसमिति संयोजकमा पूर्व कार्यवाहक अध्यक्ष सन्देश श्रेष्ठ र संघसंस्था समन्वय संयोजक राजाराम पौडेल र क्वीक रेस्पोन्स संयोजक उमा आले छन् ।
मञ्चका पूर्व अध्यक्षहरु तथा हालका सल्लाहकार एवं कानूनी सल्लाहकारलाई अवार्डको सल्लाहकारमा चयन गरिएको छ । अन्य उपसमिति आवश्यकता बमोजिम थप गरिने जनाइएको छ ।
भेलामा सहभागी नेपाल पत्रकार महासंघ गण्डकी अध्यक्ष रमेश पौडेलले स्पोर्टस् अवार्डलाई सबै पत्रकारले अपनत्व लिनुपर्ने र यो अवार्ड सिंगो गण्डकी प्रदेशकै गौरवको इभेन्ट भएको उल्लेख गरे । यसैगरी, नेपाल पत्रकार महासंघ कास्की अध्यक्ष माधव बराल, नेपाल फोटो पत्रकार संघ कास्की अध्यक्ष राम गुरुङ, मञ्चका पूर्व अध्यक्षहरु विनोद लामिछाने, प्रेमनारायण न्यौपाने, एकराज गिरी, दीननाथ बराल, सल्लाहकार सुरज श्रेष्ठ, पूर्व कावा अध्यक्ष सन्देश श्रेष्ठलगायतले विभिन्न सल्लाह सुझाव दिए ।
मञ्चले यसपालि लाइफटाइम अचिभमेन्ट अवार्डसहित ८ विधामा अवार्ड प्रदान गर्दैछ । जसमा वर्ष खेलाडी पुरुष, वर्ष खेलाडी महिला, वर्ष उदीयमान खेलाडी, वर्ष उत्कृष्ट प्रशिक्षक, वर्ष उत्कृष्ट खेल पत्रकार, वर्ष उत्कृष्ट खेल संघसंस्था र पपुलर प्लेयर हुन् ।
ठिक एक महिनापछि हुने उक्त अवार्र्ड खेलाडी सम्मानमा गण्डकीकै ठूलो इभेन्ट हो ।
