अखिल नेपाल फुटबल संघ (एन्फा) को आयोजनामा यही २०८२ चैत १२ गते दशरथ रंगशालामा हङकङ, चाइनासँग हुन लागेको अन्तर्राष्ट्रिय मैत्रीपूर्ण खेल स्थगित भएको छ । एन्फाले एक विज्ञप्ति जारी गर्दै सो खेल स्थगित गरिएको जानकारी दिएको हो ।
राष्ट्रिय खेलकुद परिषद् (राखेप) सँग एन्फाले मिति २०८२ फागुन १० गते चलानी नम्बर ९११/०८२/०८३ (राखेप दर्ता नम्बर ३५५९) को पत्रमार्फत मैत्रीपूर्ण खेल संचालनका लागि रंगशाला र त्यसको खेलमैदानका लागि स्वीकृति मागेको थियो ।
यस्तै, मिति २०८२ चैत ३ गते पुनः चलानी नम्बर ९८२/०८२/०८३ (राखेप दर्ता नम्बर ३७९५) को पत्रमार्फत रंगशालाको फ्लडलाइट, स्कोर बोर्ड र अन्य पूर्वाधारहरु खेलका लागि उपलब्ध गराइदिन पत्र पठाएको थियो ।
तर, एन्फाले खेलमैदान तथा रंगशाला उपलब्ध गराइदिन गरेको आग्रह र खेल संचालनको स्वीकृति राखेपले नदिएकाले सो खेल स्थगित गरिएको एन्फा प्रवक्ता सुरेश शाहले बताए । खेल स्थगित भएपछि एन्फाले सम्पूर्ण नेपाली फुटबल प्रेमीहरुमा पर्न गएको असुविधाप्रति क्षमा मागेको छ ।
