नेपाल वायुसेवा निगमको भ्रष्टाचारमाथि औपचारिक छानबिन समिति गठन भई छानबिन सुरु भएको छ ।
वायुसेवा निगमभित्र जरो गाडेर बसेको बेथिति र जहाज खरिददेखि मर्मतसम्मका भ्रष्टाचार विरुद्ध प्रमाणसहितको ज्ञापनपत्र बुझाएपछि मन्त्रालयले तुरुन्तै एक्सन लिँदै उच्चस्तरीय छानबिन समिति गठन गरेको छ।
गोरखा १ बाट निर्वाचित सांसद सुधन गुरुङले फागुन २८ गते संस्कृति, पर्यटन तथा उड्डयन मन्त्रालयमा छानबिन समिति गठन गर्न निवेदन दिएका थिए ।
निवेदन प्राप्त भएपछि मन्त्रालयले शुक्रबार समिति गठन गरेको हो । समितिले ३० दिनभित्र छानबिनको प्रतिवेदन बुझाउने छ ।
समिति गठनपश्चात् सुधनले भनेका छन् ‘अब वर्षौंदेखिका काला फाइलहरू आधिकारिकरूपमै खोलिनेछन् र प्रतिवेदनको आधारमा कारबाहीको प्रक्रिया अगाडि बढाइनेछ।’
उनले राष्ट्रिय ध्वजाबाहकलाई खोक्रो बनाउने तत्वहरू अब उम्किन नपाउने बताउँदै सुशासनको लडाइँमा निरन्तर खबरदारी गर्ने बताएका छन् ।
