‘पोखरा सबै मौसमका लागि’ भन्ने मूल नारासहित पोखरा महानगरपालिका–१९ पुरुन्चौरस्थित चुरुंगामा दोस्रो संस्करणको ‘दाइँ महोत्सव’ भव्यताका साथ सम्पन्न भएको छ।
पोखरा पर्यटन परिषद्को आयोजना तथा चुरुंगा टोल विकास संस्थाको स्थानीय व्यवस्थापनमा आयोजित उक्त महोत्सवको उद्घाटन पोखरा महानगरपालिकाका प्रमुख धनराज आचार्यले गरेका थिए।
कृषिमार्फत आन्तरिक तथा बाह्य पर्यटन प्रवर्द्धन गर्ने, कृषकलाई प्रोत्साहन गर्ने र नयाँ पुस्तालाई परम्परागत कृषि प्रणालीबारे व्यावहारिक ज्ञान दिने उद्देश्यले महोत्सव आयोजना गरिएको हो।
महोत्सवमा पोखरा–२३ का कृषक फवेन्द्र कुमार गुरुङलाई ‘उत्कृष्ट धान उत्पादक किसान’ को रूपमा सम्मान गरिएको छ।
२ सय रोपनी क्षेत्रफलमा धान खेती गरी करिब ५ सय मुरी धान उत्पादन गर्न सफल गुरुङलाई कृषिमा पुर्याएको योगदानको कदर गर्दै प्रमुख अतिथि मेयर आचार्यले १० हजार रुपैयाँ नगदसहित सम्मानपत्र प्रदान गरे।
महोत्सवका क्रममा कृषि र जनजीवनसँग जोडिएका विभिन्न रोचक प्रतियोगिताहरू सञ्चालन गरिएका थिए।
जसमा उत्कृष्ट गोरु पालक प्रतियोगिता, धान चुट्ने (दँदेरो) प्रतियोगिता, परालको भारी बाँध्ने प्रतियोगिता र गुन्द्री बुन्ने प्रतियोगिता मुख्य आकर्षण बनेका थिए।
कार्यक्रममा पोखरा भ्रमणमा रहेका विदेशी पर्यटकहरूको समेत उल्लेख्य उपस्थिति रहेको थियो।
माछापुच्छ्रे र अन्नपूर्ण हिमशृङ्खलाको मनोरम दृश्यका माझ सम्पन्न महोत्सवमा विदेशी पाहुनाले नेपाली परम्परागत खेती प्रणाली र दाइँको प्रत्यक्ष अनुभव बटुलेका थिए। सहभागीहरूलाई स्थानीय आमा समूहले पञ्चेबाजासहित फूलमाला लगाएर परम्परागत शैलीमा स्वागत गरेका थिए।
कार्यक्रम संयोजक हरिबहादुर भुजेलले महोत्सवमा अपेक्षा गरेभन्दा धेरै दर्शकको उपस्थिति रहेको जानकारी दिए।
नेपाल पर्यटन बोर्ड गण्डकी प्रदेशका वरिष्ठ निर्देशक मणिराज लामिछानेले यस्ता महोत्सवले आन्तरिक तथा बाह्य पर्यटकलाई स्थानीय कृषि प्रणाली र पहिचान नजिकबाट बुझ्न मद्दत पुर्याएको बताए।
त्यस्तै, स्थानीय माधव गौतमले आफ्नै गाउँठाउँमा महोत्सव हुँदा किसानहरूमा थप उत्साह जागेको प्रतिक्रिया दिए।
महोत्सवमा सहभागी दँदेरा (धान चुट्नेहरू) लाई आयोजकले टोपी उपहार स्वरूप प्रदान गरेका थिए भने अतिथिहरूलाई स्थानीय उत्पादन र हस्तकलाका सामग्री उपहार दिइएको थियो।
तस्बिर सौजन्यः दीपक परियार
