एकीकृत शक्ति प्रदर्शन गर्ने उद्देश्यसहित नवगठित ‘नेपाली कम्युनिष्ट पार्टी’ ले गण्डकी प्रदेशस्तरीय सन्देश सभा यही मंसिर १४ गते आइतबार पोखरामा आयोजना गर्ने भएको छ।
शुक्रबार पोखरामा आयोजित पत्रकार सम्मेलनमा पार्टीले सभाको तयारी अन्तिम चरणमा पुगेको जानकारी दिएको हो।
आयोजकका अनुसार आइतबार हुने सन्देश सभालाई पार्टीका संयोजक एवं पूर्वप्रधानमन्त्री पुष्पकमल दाहाल ‘प्रचण्ड’, सहसंयोजक एवं पूर्वप्रधानमन्त्री माधवकुमार नेपाल तथा नेता भीम रावललगायतले सम्बोधन गर्ने कार्यक्रम तय भएको छ।
साथै, गण्डकी प्रदेशको जिम्मेवारीमा रहेका अन्य शीर्ष नेताहरूले पनि सभामा आफ्ना धारणा राख्नेछन्।
भालाई भव्य रूपमा सम्पन्न गर्न विभिन्न उपसमितिहरू गठन गरी काम भइरहेको जनाइएको छ।
पत्रकार सम्मेलनमा दिइएको जानकारी अनुसार जनपरिचालन, स्वयंसेवक, प्रचारप्रसार, आर्थिक व्यवस्थापन, मञ्च व्यवस्थापन, अतिथि सत्कार र सांस्कृतिक उपसमितिहरू सक्रिय रूपमा तयारीमा जुटेका छन्।
पत्रकार भेटघाटमा बोल्दै पार्टीका इन्चार्जत्रय दिनानाथ शर्मा (साविक माओवादी केन्द्र), श्रीनाथ बराल (साविक नेकपा एस) र विश्वनाथ शर्मा (साविक नेसपा- महेन्द्र राय यादव पक्ष) ले देशमा छरिएर रहेका कम्युनिष्टहरूलाई एकताबद्ध गर्दै समाजवादको लक्ष्य हासिल गर्न पार्टी एकीकरण गरिएको बताए।
दिनानाथ शर्माले यो एकतालाई नेपाली कम्युनिष्ट आन्दोलनको ठूलो उपलब्धिको रूपमा व्याख्या गरे।
यस्तै, श्रीनाथ बरालले यो एकताले भ्रष्टाचारको अन्त्य, सुशासन र युवालाई स्वदेशमै बस्ने वातावरण सिर्जना गर्ने दाबी गरे भने विश्वनाथ शर्माले नेपाली विशेषताको समाजवादमा जानका लागि कम्युनिष्ट आन्दोलनलाई संगठित गरिएको बताए।
विभिन्न राजनीतिक दलहरूबीच एकीकरण भई गत कात्तिक १९ गते काठमाडौँमा एकता घोषणा सभा तथा प्रथम राष्ट्रिय सम्मेलन सम्पन्न भएपछि विधिवत रूपमा ‘नेपाली कम्युनिष्ट पार्टी’ गठन भएको थियो।
सोही एकताको सन्देश तल्लो तहसम्म पुर्याउन प्रदेशस्तरीय सभा आयोजना गर्न लागिएको हो।
