नेपाली टोलीले आईसीसी टी–२० विश्वकपको छनोटको तयारीस्वरुप भएको वार्मअप खेलमा लगातार दोस्रो जित दर्ता गरेको छ ।
आज भएको खेलमा नेपालले कतारलाई १६ रनले स्तब्ध पारेको हो ।
नेपालले दिएको १७१ रनको लक्ष्य पछ्याउने क्रममा कतार निर्धारित २० ओभरमा ६ विकेट गुमाउँदै १५४ रनमै समेटियो । कतारका लागि तन्भिरले ३७ बलमा सर्वाधिक ५१ रन जोडे पनि टोलीलाई जिताउन भने सकेनन् । मिर्जाले अन्तिममा ४० रन जोडेर खेललाई रोमाञ्चक मोडमा पुर्र्याएका थिए ।
त्यसअघि टस जितेर पहिले ब्याटिङ रोजेको नेपालले निर्धारित २० ओभरमा ७ विकेट गुमाउँदै १७० रन जोडेको थियो ।
नेपालका लागि ओपनर कुशल भुर्तेलले सर्वाधिक अर्धशतकीय इनिङको योगदान गरे । उनले ३३ बलमा ५६ रन जोडे ।
यस्तै, कुशल मल्ल २० बलमा ३८ रन बनाएर अविजित रहँदा दीपेन्द्रसिंह ऐरी पनि २१ बलमा ३८ रन बनाएर आउट भए ।
