पोखराको फुलबारीस्थित बिगमार्टले बेचेको चामल न्यून गुणस्तरको पाइएपछि खाद्य प्रविधि तथा गुण नियन्त्रण विभाग पोखराले कारवाहीको प्रक्रिया सुरु गरेको छ ।
असारको तेस्रो हप्ता चामल खरिदकर्ताले घरमा लगेर हेर्दा कुहिएको पाएपछि विभागलाई खबर गरेको थियो । त्यसपश्चात् विभागले नमुना परीक्षण गर्दा न्यून गुणस्तर भएको पाइएपछि जिल्ला प्रशासन कार्याललयमा मुद्दा दर्ताको प्रक्रिया सुरु गरेको छ ।
विभागका प्रमुख नवराज दाहालले अनुसन्धान अधिकृतको राय पछि सरकारी वकिलको कार्यालयबाट तयार पारिने अभियोजनपत्र अनुसार प्रशासनमा मुद्दा दर्ता गर्ने नयाँलिपिलाई जानकारी दिए ।
‘उक्त चामल अखाद्य भएको खण्डमा अदालतमा मुद्दा चलाईने थियो’ प्रमुख दाहालले भने ‘न्यून गुणस्तर पाइएकाले प्रशासन कार्यालयमा दायर हुनेछ । र, त्यहीबाट कारवाही वा सजाय गरिनेछ ।’
मार्टमा बेचिएको चामल भारतमा उत्पादन भएको र प्याकेजिङ् राम्रोसँग नगर्दा गुणस्तर कमसल भएको उनको प्रतिक्रिया छ ।
अब खाद्य निरीक्षकको राय अनुसार सरकारी वकिलको कार्यालयले अभियोजनपत्र तयार पार्नेछ ।
खाद्य स्वच्छता तथा गुणस्तर ऐन २०८१ को दफा ४० अनुसार यस प्रकृतिको मुद्दामा ६ महिना कैद ,३ लाख रुपैयाँ जरिवाना वा दुबै सजाय हुने व्यवस्था रहेको छ भने प्रशासन कार्यालयले उपभोक्तालाई क्षतिपुर्ति दिलाउने फैसला गर्नसक्छ ।
