नयाँलिपिः गण्डकी विश्वविद्यालय (जियु)मा रिक्त रहेको कूलपति छनौटको प्रक्रिया अन्तिम चरणमा पुगेको छ ।
रिक्त पदमा ७ जनाले दिएको आवेदनमध्ये पहिलो चरणमा प्राडा कृष्णप्रसाद गौतम र सहप्राडा कृष्णप्रसाद अधिकारी अस्वीकृत भएपछि २ दिन लगाएर बाँकी पाँचजनाको प्रिजेन्टेशन र अन्तर्वार्ता सकिएको छ ।
अन्तर्वार्ताको अन्तिम दिन बुधबार प्राडा विश्वकल्याण पराजुली र प्राडा सरोज कोइरालालाई बोलाइएको थियो । उनीहरुले बिहान प्रिजेन्टेशन र दिउँसो अन्तर्वाता दिएका हुन् ।
प्राडा इन्द्रप्रसाद तिवारी, प्राडा कुसुमाकर न्यौपाने र प्राडा नवराज देवकोटाको अन्तर्वार्ता अघिल्लो दिन लिइएको थियो । जसमध्ये प्राडा देवकोटा हाल विश्वविद्यालयकै उपकूलपति हुन् ।
उल्लेखित पाँच नाममध्ये तीनजनाको नाम गण्डकी विश्वविद्यालयको कुलपति छनोट समितिले आज प्रदेश मुख्यमन्त्री सुरेन्द्रराज पाण्डेलाई बुझाएका छन् ।
छनोट समिति संयोजकमा प्राडा कैलाशनाथ प्याकुरेल रहेका छन् ।
अघिल्लो पटक नेकपा एमालेको भागमा परेको कूलपति पद अहिले भने नेपाली कांग्रेसको भागमा परेको बताइन्छ । कांग्रेसको भागमा परे तिवारी र न्यौपाने प्रबल दाबेदार हुन् ।
बन्द खाममा कोइराला, देवकोटा र न्यौपानेको नाम रहेको आंकलन गरिएको छ ।
जानकारका अनुसार सामाजिक विकास, युवा तथा खेलकुदमन्त्री विन्दुकुमार थापाको जोडबल चले न्यौपाने जियुका आगामी कूलपति हुन् ।
प्रदेश सरकार मातहत रहेको जियूका प्रथम कुलपति प्राडा गणेशमान गुरुङको पदावधि फागुन ४ मा सकिएपछि नयाँ कूलपतिको छनौट प्रक्रिया सुरु भएको हो ।
