दिपक के श्रेष्ठः एक वर्षअघि नेपाल कम्युनिष्ट पार्टी (नेकपा)का महासचिव नेत्रविक्रम चन्द ‘विप्लव’ले जनकम्युनको अवधारणालाई मुर्तरुप दिन कपिलवस्तुमा बाउसे गरेको भिडियो सार्वजनिक गरेका थिए ।
हरियो गञ्जीमुनी पाइन्ट काटेर बनाएको कट्टुमा महासचिव विप्लव चैते धान रोप्न फरुवाले गह्रा मिलाउँदै गरेको उक्त भिडियोमा देख्न सकिन्छ । भिडियोलाई ‘स्टन्टबाजी’ पनि भनियो । तर, वर्ष दिनपछि उक्त भनाई गलत सावित भएको छ ।
नेकपाले नवौं महाधिवेशनबाट ‘एकीकृत स्वामित्व प्रणाली’लाई निर्णय नै गरेर कार्यान्वन गरेपछि यतिबेला नेकपा कार्यकर्ताहरु विभिन्न जिल्लामा खेती र पशुपालनमा जुटेका छन् । जसको नतीजा सकारात्मक देखिएको केन्द्रीय सदस्य काजी सी बताउँछन् ।
लामो समय कास्की र गण्डकी क्षेत्रमा पार्टीको जिम्मेवारी सम्हालेका काजीका अनुसार पोखराको छिनेडाँडामा सुरु गरेको कृषिकर्मले उत्साहित बनाएको छ । त्यहाँ १४ रोपनी जमिन भाडामा लिएर सुरु गरेको खेतीबाट करिब ६५ रोपनी आलु फल्यो ।
अहिले उनीहरु चैते धानको तयारीस्वरुप ब्याड बनाउन र बिउँ राख्ने चटारोमा छन् । गण्डकी प्रदेश इन्चार्ज उमा भुजेल स्वयं कृषिकर्ममा जुटेकी छिन् । परम्परागत खेतीसँगै आधुनिक र व्यावसायिक तहमा अघि बढ्न अध्ययन र सिकाइलाई पनि जोड दिएको केन्द्रीय सदस्य काजी बताउँछन् ।
चैते धान रोप्ने मेसोबीच काँक्रा र मकै छर्ने चटारोसमेत छिनेडाँडामा थपिएको छ । साथै, सोही जमिनमै रहेको पुरानो शैलीकै घरमा पार्टीको प्रदेश कार्यालयसमेत राखिएकाले कृषिकर्ममा जोडिन सहज भएको छ ।
यसैबीच पार्टी महासचिव विप्लव एक हूल भेडाको बथानसँगै देखिएका छन् । उक्त भेडाको बथान कालिकोटको भएको काजीले जानकारी दिए ।
खाइलाग्दा ज्यान भएको भेडाको बथानमा गोठाले शैलीमा उभिएका विप्लवको तस्बिर देखेपछि एक वर्षअघि कपिलवस्तुमा बाउसे गरेको भिडियो स्टन्टबाजी नभएको पुष्टी भएको छ ।
उक्त सामुहिक भेडापालन नरहरिनाथ गाउँपालिकाकाे रुप्सा, चिसापानीमा सुरु गरिएको हो । वर्षअघि २० वटा भेडाबाट सुरु गरिएको सामुहिक यात्रामा अहिले १ सय भेडा पुगेको काजीले जानकारी दिए ।
‘त्यहाँ नेकपा र कार्यकर्तालेमात्र लाभ लिने उद्देश्य नभई पुरै गाउँलाई आर्थिक समृद्धिमा डो¥याउने योजना छ’ काजी भन्छन् ‘पार्टी कार्यकर्ता बाहेक स्थानीयसँग पनि सामुहिक खेतीमा सहकार्य गर्न सक्छौं ।
कालीकोटमा भेडापालनसँगै स्याउखेतीसमेत सुरु गरिएको काजी बताउँछन् ।
हालसम्म एकीकृत स्वामित्वमार्फत देशभर सहकारी खेतीका ७ केन्द्र र ७७ उपकेन्द्र रहेको उनले बताए । कतिपय उत्पादन त्यहीको केन्द्र वा उपकेन्द्रबाट बिक्री गरिँदै आइएको छ भने काठमाण्डौंमा ‘सी व्यापार केन्द्र’ खोलिएको छ ।
नेकपाका अनुसार अब पार्टी साना र घरेलु उद्याेग स्थापनाकाे तयारीमा जुटेकाे छ ।
