पोखराः गत कात्तिक ५ गते पोखराको ट्रेडमल अगाडी पार्किङमा राखेको मोटरसाइकल चोरेर हिँडेका डेभिज फल निवासी विजय थापा पक्राउ परेका छन् ।
थापालाई जिल्ला प्रहरी कार्यालयले प्रमाणसहित पक्राउ गर्न सफल भएको बताएको छ । थापाले ग २३ प ९२०८ नम्बरको ड्युक मोटरसाइकल चोरी गरी त्यसको पार्टपुर्जा ग १६ प १४६२ नम्बरकाे मोटरसाइकलमा राखेको र केही सामान बिक्री गर्ने उद्देश्यले फेसबुकमा राखेका थिए ।
त्यसैलाई आधार मानेर खोजतलाश गर्दा २२ वर्षीय थापालाई प्रहरीले घारिपाटनस्थित कोठाबाट पक्राउ गरेको जिप्रका कास्कीका सूचना अधिकारी बसन्तकुमार शर्माले जनाएका छन् ।
भाडामा लिएको उक्त कोठाबाट प्रहरीले मोटरसाइकल र पार्टपुर्जासमेत बरामद गरेको छ । थापालाई चोरी तथा डाँका कसुरमा जिल्ला अदालत कास्कीबाट ५ दिन म्याद लिई थप अनुसन्धान सुरु गरिएको शर्माले बताएका छन् ।